Россия Федерацияси Президенти Владимир Путин болалар учун мўлжалланган «Спокойной ночи, малиши!» («Хайрли тун, болалар!») кўрсатувининг янги қаҳрамонини ўйлаб топди. Янги қаҳрамон телеэкранларда октябрь ойида пайдо бўлиши кутилмоқда. Бу ҳақда «РИА Новости» хабар берди.
«Анчадан бери кўрсатув учун янги қўғирчоқ-қаҳрамон излаётган эдик. Биз жуда кўп вариантларни кўриб чиқдик. Бироқ, ростини айтсам, янги қаҳрамон ғояси президент томонидан илгари сурилди. Аввалига бу кутилмаган таклиф ҳақида ўйлаб қолдик, бироздан сўнг, унинг мўлжалга аниқ текканини тушуниб етдик», — дейди «Класс!» телекомпанияси директорлар кенгаши раҳбари Александр Митрошенков.
Митрошенков, шунингдек, янги қаҳрамон 3D форматда — ҳақиқий компьютер қаҳрамони бўлишини, табассум қилиш, қўл бериб кўришиш ва гаплаша олиш қобилиятларига эга бўлишини айтиб ўтди. Бир кадрда бошловчи, қўғирчоқ-қаҳрамонлар ва анимацияни бирлаштириш ўзига хос лойиҳа бўлиб, унда, 3D-қаҳрамондан ташқари, унинг ҳақиқий «тирик» акаси ҳам иштирок этади.
«Икки ҳафтадан сўнг ҳамма янги қаҳрамон кимлигини билиб олади ва, ўйлашимча, кўпчилик президентнинг бу воқеага қандай алоқаси борлигини тушуниб етади», — деб таъкидлади Митрошенков.
Изоҳ (0)