Анжелина Жоли ва Брэд Питт 23 август куни турмуш қурди, дея хабар бермоқда Associated Press актёрларнинг матбуот котибига таяниб. Тўй маросими Францияда бўлиб ўтган.
Никоҳ маросими кичик ибодатхонада оила ва дўстлар даврасида ўтказилган. Таъкидланишича, Питт ва Жолига никоҳ қайд этилгани ҳақидаги ҳужжатни Калифорния судьяси топширган.
Тантанада киноюлдузларнинг фарзандлари ҳам иштирок этди. Жоли меҳроб ёнига ўз ўғиллари Мэддокс ва Пакс ҳамроҳлигида борган, Захара ва Вивьен гул япроқларини сочган, Шайло ва Нокс эса узукларни келтирган.
Нашрнинг эслатишича, жуфтлик 2012 йил апрелда унаштирилганликларини маълум қилган эди.
Жоли учун бу учинчи никоҳдир. Бундан аввал у Жонни Ли Миллер ва Билли Боб Торнтон билан турмуш қуриб, ажрашган. Бред Питт эса бунгача Женнифер Энистон билан никоҳ тузиб, беш йиллик турмушдан сўнг 2005 йилда ажрашган. Расмий бўлмаган маълумотларга кўра, актёрнинг Жоли билан муносабатлари «Мистер ва миссис Смит» фильмини суратга олиш жараёнида — ҳали Энистон билан ажрашиб улгурмай, бошланган.
Питт ва Жолининг олти фарзанди бор, уларнинг уч нафари асраб олинган.
Изоҳ (0)