Япония ғарбидаги Сасебо шаҳрида 15 ёшли қиз ўз тенгдошини шафқатсиз равишда ўлдириб, мурдани бўлаклаб ташлади. Қиз жиноятни содир этганини тан олди, бироқ заррача ҳам пушаймонлик билдирмади. Бу ҳақда Japan Times хабар берди.
27 июлга ўтар кечаси жиноятчи қизнинг синфдоши Айва Мацуо ота-онасига ўз дугонасиникида ётиб қолишини айтади. Бироқ эртасига уйига қайтиб келмайди, қўнғироқларга ҳам жавоб бермайди. Хавотирга тушган ота-она полицияга мурожаат қилади. Мезбон қизнинг уйига бостириб борган полициячилар даҳшатли манзарага гувоҳ бўлишади: каравотда Айва Мацуонинг боши узиб ташланган жасади ётар эди.
Полициячилар сўзларига кўра, уй эгаси ўз дугонасига оғир буюм билан зарба бериб, ҳушидан кетказган, бўғиб ўлдирган ва шундан сўнг, бошини узган. Бундан ташқари, зўравон қиз дугонасининг қўлини ҳам кесиб ташлаган. Кейинроқ тергов чоғида қиз қилган жиноятига иқрор бўлди. Бироқ қотиллик қандай мақсадда амалга оширилгани номаълум. Полиция аниқлашича, қиз ўз ота-онасидан алоҳида яшаган.
Жиноятчининг дўстлари у жуда ақлли қиз экани, бироқ жаҳли тез чиқишини айтган. Қотилга нисбатан қандай жазо қўлланилиши номаълум.
Статистикага кўра, Япония дунё бўйича энг паст қотиллик кўрсаткичига эга. Шундай бўлса-да, сўнгги 20 йил ичида мамлакатда мактаб ўқувчилари томонидан қатор ваҳшиёна қотилликлар амалга оширилган.
Изоҳ (0)