1994 йил 16 октябрь Хиросимадаги «Биг Арч» стадионида бўлиб ўтган 12-Осиё ўйинларининг финал босқичида Ўзбекистон Хитойни мағлубиятга учратган эди. Миржалол Қосимов «Олам Спорт» нашрига берган интервьюсида ҳозирга қадар ягоналикни сақлаб келаётган айнан шу тарихий ғалаба ҳақида гапирди.
Миржалол Қосимов: Осиё ўйинларида эришилган ютуқнинг салмоғи, унинг моҳияти қанчалик юқори эканлигини энди тушуниб етяпмиз. Бу мустақиллик йилларида эришилган дастлабки катта ютуқ эди. Ҳақиқатан ҳам, таркибимиз жуда ҳам кучли, шу билан бирга аҳил бўлган. Ғалабанинг калити ҳам шунда бўлса керак. Қолаверса, стадиондаги мухлисларнинг қўллаб-қувватлаши ҳам кучимизга куч, ғайратимизга ғайрат қўшган.
— Терма жамоамиз муваффақиятида мураббийларнинг ҳиссаси қай даражада бўлган?
Миржалол Қосимов: Терма жамоага Рустам Акрамов ва Биродар Абдураимов биргаликда устозлик қилишган. Ҳар бир рақиб жиддий тарзда ўрганилган. Назарий машғулотларда бизга рақиб ҳақида маълумотлар, тегишли кўрсатмаларни бериб боришган. Ўйлайманки, бу икки забардаст мураббийимизнинг ҳам тарихий ғалабанинг қўлга киритилишида ҳиссалари катта бўлган.
— Ярим финал бу алоҳида мавзу. Корейсларга қарши кечган ўйинни ўша пайтда финалга қиёслашган экан...
Миржалол Қосимов: Ҳақиқатан ҳам, ўша учрашувда кореялик футболчилар жуда кучли ўйин намойиш этганди. Дарвозамиз олдида тинимсиз хавфли вазиятларни юзага келтиришган, Шейкин жамоамизни бир неча бор муқаррар голлардан қутқариб қолган эди. Юра «Дарвозабон — ярим жамоа» деган иборани юз фоиз оқлаган. Биз, асосан, қарши ҳужум тактикасида ҳаракат қилгандик. Чунки очиқ футбол намойиш эта олмасдик.
— Орадан 20 йил ўтиб, энди бош мураббий сифатида терма жамоани Осиё ўйинларига бошлаб борасиз. Билишимизча, терма жамоа олдига катта вазифалар қўйиляпти. Мусобақага эса оз фурсат қолди. Якуний тайёргарлик режаси ишлаб чиқилганми?
Миржалол Қосимов: Ҳақиқатан ҳам жуда қизиқ ҳолат. Ҳам футболчи, ҳам мураббий сифатида Осиё ўйинларида ғолиб бўлиш имконияти мавжуд, дея оламан. Тайёргарлик 20 июлдан бошланади. Тошкентда ўтказиладиган бир ҳафталик ўқув-машғулот йиғинига 1991—93 йилларда туғилган футболчилар таклиф этилган. Шунингдек, яна уч нафар ёши катта футболчини ҳам таркибга киритишим мумкин. Йиғин доирасида маҳаллий жамоаларимиз билан назорат учрашувлари ўтказиш режалаштирилган. Албатта, ҳар бир терма жамоа аъзосининг олий мақсади ушбу Осиё ўйинларида зафар қучиш. Федерациямиз раҳбарияти ҳам терма жамоа олдига чемпион бўлиш вазифасини қўйган. Ўйлайманки, бу вазифани бажариб, она Ватанга ёруғ юз билан қайтамиз.
— Сентябрь ойида ўтказиладиган 17-Осиё ўйинлари ФИФА тақвимидан жой олмаган. Бу эса футболчиларни терма жамоага узоқ муддатга таклиф қилишингизда муаммоларни юзага келтириши мумкин. Бу масалани қандай ҳал қилмоқчисиз?
Миржалол Қосимов: Тўғри таъкидладингиз, биз ҳамиша ФИФА тақвими бўйича муаммоларга дуч келганмиз. Бўлажак Осиё ўйинлари ҳам бундан мустасно бўлмайди. Шуни тўғри англаган ҳолда асосий урғуни олий лигамизда ўйнаётган ўйинчиларга берамиз. Азиз Ҳайдаров, Виталий Денисов, Одил Аҳмедов каби легионер футболчиларимизни ўз клублари бундай узоқ муддатга қўйиб юбормайди. Шундай бўлса-да, аввало, футболчининг ўзи, кейин эса клуб раҳбарлари билан гаплашиб кўрамиз.
— Таркибга жалб қилиниши мумкин бўлган ёши катта уч нафар футболчи масаласида бир тўхтамга келдингизми?
Миржалол Қосимов: Миллий чемпионатимизнинг биринчи давраси якунланди. Номзод футболчиларни кузатиб бордим. 20—28 июль кунларига белгиланган йиғинимизни якунлаб олгач, мураббийлар штаби билан бирга бу масалада бош қотирамиз. Номзодлар етарли. Уч нафар ёши катта футболчини август ойида ўтказадиган йиғинимиз чоғида аниқлаб оламиз.
— Сиз параллел равишда миллий терма жамоада ҳам фаолият юритасиз. Табиийки, айрим йиғинлар деярли бир хил вақтга тўғри келиб қолиши мумкин. Бу масаланинг ечимини қандай топмоқчи бўляпсиз?
Миржалол Қосимов: Миллий терма жамоани ҳам ёддан чиқармаслик лозим. Ҳар ойда йиғин ўтказиш тасдиқланган. Август, сентябрь ва октябрь ойларига ўртоқлик учрашувлари белгиланган. Осиё ўйинларида қатнашадиган футболчиларнинг катта қисми миллий терма жамоада ҳам ўйнайди. Ўйлашимча, бу борада муаммо бўлмайди. Осиё ўйинлари ҳам биз учун муҳим. 1994 йилги муваффақиятни такрорлаш учун астойдил ҳаракат қиламиз. Бугунга келиб шаклланган терма жамоа бу вазифани уддалашга қодир. Инчеонда ўтказиладиган 17-Осиё ўйинларида чемпионликдан ўзга натижа бизни қониқтирмайди.
Изоҳ (0)