Кўплаб давлатлар ўз фуқароларини интернет орқали кузатаётганини сир сақламоқда, деб айтди БМТнинг инсон ҳуқуқлари бўйича комиссари Нави Пиллей шахсий ҳаёт дахлсизлигига бағишланган нутқида. Бу ҳақда «Российская Газета» хабар берди.
БМТ мутахассислари бир йилдан кўпроқ муддат давомида маълум бир давлат ҳудуди ва унинг ташқарисидаги электрон хабарларни кузатиш ва шахсий маълумотларни йиғиш учун рақамли технологиялардан фойдаланганлар ҳақида ахборот йиғди. Кўп давлатларнинг тегишли органлари барча керакли маълумотларни хусусий компаниялар ҳамда Интернет провайдерларидан олаётгани ва бу ҳаракат фойдаланувчиларнинг ўзидан сир сақланаётгани аниқланди.
Ўзаро алоқага доир ҳар қандай маълумотни йиғиш шахсий ҳаётга аралашув эканлигини қайд этиб, «Оммавий кузатиш фавқулодда чора эмас, балки хавфли одатга айланмоқда», — деб таъкидлади Нави Пиллей.
Шунингдек, нутқда кўплаб мамлакатларда кузатув ишлари қонун билан назорат қилинмаётгани, бу эса шахсий ҳаётга аралашувнинг кўпайишига хизмат қилиши ҳақида айтиб ўтилди.
Эслатиб ўтамиз, Инсон ҳуқуқлари умумжаҳон декларацияси ҳамда Фуқаролик ва сиёсий ҳуқуқлар тўғрисидаги пакт каби халқаро шартномаларда ҳеч кимнинг шахсий ҳаётига аралашиш мумкин эмаслиги қайд этилган. Бундан ташқари, БМТнинг 2013 йилдаги Бош Ассамблеясида инсоннинг реал ҳаётдаги ҳақ-ҳуқуқлари интернет оламида ҳам амал қилиши тўғрисидаги резолюция қабул қилинган.