Март ойида йўқолиб қолган Малайзиянинг «Боинг»и йўловчилари оила аъзоларига 50 минг доллар миқдорида товон пули берилиши бошланди. Бу ҳақда Reuters хабар берди.
Малайзия ташқи ишлар вазири ўринбосари Ҳамза Зайнудин маълум қилишича, Малайзиядаги олти оила ва Хитойдаги бир оила суғурта тўловига аллақачон мурожаат қилишган.
Унинг айтишича, йўловчилар оилалари ҳозирги товон пулидан уч баробар кўп тўловни талаб қилишлари мумкин. Бироқ оширилган товон пули лайнер қидируви тўхтагани ҳақида расман эълон қилинганидан кейингина тўланиши мумкин.
Айни пайтда Хитойнинг Zhu Kezhen тадқиқот кемаси океан қаърида қидирув олиб боришга тайёрланмоқда. Қутқарувчилар океан тубидаги харитага киритлмаган 60 минг км² майдонни қидириб чиқмоқчи.
Эслатиб ўтамиз, Malaysia Airlines’га қарашли Boeing 777-200ER самолёти 8 март куни Куала-Лумпурдан Пекинга парвоз этаётиб, радарлардан йўқолиб қолган. У Малайзия ва Вьетнам чегарасини кесиб ўтганидан кейин бир неча дақиқа вақт ўтгач, алоқа узилган. Бевосита ғойиб бўлишидан аввал ундан олинган хабарда бирор муаммо ҳақида гап ҳам бўлмаган. Самолёт бортида 12 нафар экипаж аъзолари билан бирга жами 239 киши бўлган.
Изоҳ (0)