Англиялик олимлар инфарктнинг олдини олувчи вакцина кашф қилишди

Гарвард институти олимлари инфарктнинг олдини олувчи вакцина яратди, деб хабар беради «ИТАР-ТАСС», The Daily Telegraph маълумотлари асосида.

Бу кашфиёт инсон жигаридаги ген — PCSK9 га таъсир кўрсатиш технологиясига асосланади. Чунки бу ген фаолиятининг издан чиқиши юрак қон-томир тизимида холестериннинг ошиб кетишига олиб келади. Томирлар ички деворларида кўп миқдорда холестерин тўпланиши инфарк пайдо бўлиши хавфини келтириб чиқаради.

— Бизнинг муолажамиз генларга таъсир кўрсатиш ва шу орқали инфарктнинг олдини олишни таклиф этади,— дейди тадқиқот гуруҳи раҳбарларидан бири, профессор Киран Мусунуру. — Тадқиқотларимиз сичқонларда ўтказилди. Бир неча кун мобайнида улар қонидаги холестеринни 40 фоизгача камайтиришга эришдик. Бу вакцина инфаркт келиб чиқишини 30—90 фоизгача камайтиришга ёрдам беради.

Ушбу восита PCSK9 гени мутациясининг ўзига хос шаклини ўрганиш асосида яратилган. Мутантлашган ген инсон қонидаги холестериннинг кам миқдорда бўлишини таъминлайди.

— Инфарктнинг олдини олиш механизмини табиатнинг ўзи бошқариб боради, — деб таъкидлади Гарвард профессори. — Шу билан бирга у ҳеч қандай салбий оқибатларга олиб келмайди.

Тадқиқотчиларнинг маълум қилишича, инфарктнинг олдини олувчи восита ўн йиллардан кейин оммавий фойдаланиш учун тайёр бўлади.