Ким Чен Ин Путинга тасанно айтди
КХДР етакчиси Ким Чен Ин Россия куни муносабати билан табрик телеграммасини жўнатди, дея хабар берди «ИТАР-ТАСС».
«Президент раҳбарлиги остида Россия халқи мамлакат хавфсизлиги ва барқарорлигини таъминлашда, иқтисодиётни модернизация қилишда ва мудофаа қобилиятини мустаҳкамлашда катта муваффақиятларга эришди», — дейилади мактубда.
Ким Чен Ин фикрича, Россия ва Шимолий Корея ўртасидаги дўстлик ва ҳамкорлик алоқалари «уларнинг халқлари манфаати йўлида кенгайишда ва ривожланишда давом этмоқда». У икки мамлакат муносабатлари «бундан кейин ҳам ўзаро имзоланган ҳужжатлар асосида мустаҳкамланиб бориши»га ишонч билдирган.
Таъкидлаш жоиз, май ойида Путин собиқ Иттифоқ томонидан тақдим этилган кредитлар бўйича республика қарздорлигини тартибга солиш ҳақида ҳукуматлараро шартномани ратификация қилган эди. Москва Шимолий Кореянинг 11 миллиардлик қарзидан воз кечган.
