Австралиялик бизнесмен Итан Хант 8 март куни изсиз йўқолган Малайзиянинг «Боинг« 777-200 самолёти тақдири ва эҳтимолий ўрни ҳақида тақдим этилган маълумот учун 5 миллион доллар миқдорида мукофот ҳақида эълон қилди. Бу ҳақда «ИТАР-ТАСС» хабар берди.
«Биз ғарбий мамлакатлар махсус хизматлари ушбу самолёт ва унинг қисмати ҳақида аниқ маълумотга эга, деб ҳисоблаймиз, — деди Хант. — Улар орасида тегишли ахборотни пул мукофоти эвазига тақдим этишга тайёр кишилар топилиши мумкин».
Итан Хант пул оммабоп интернет-порталлардан бири орқали йиғила бошлаганини айтди. Зарур миқдордаги пул яқин икки ҳафтада йиғилиб қолиши мумкин.
Эслатиб ўтамиз, Malaysia Airlines’га қарашли Boeing 777-200ER самолёти 8 март куни Куала-Лумпурдан Пекинга парвоз этаётиб, радарлардан йўқолиб қолган. У Малайзия ва Вьетнам чегарасини кесиб ўтганидан кейин бир неча дақиқа вақт ўтгач, алоқа узилган. Бевосита ғойиб бўлишидан аввал ундан олинган хабарда бирор муаммо ҳақида гап ҳам бўлмаган. Самолёт бортида 12 нафар экипаж аъзолари билан бирга жами 239 киши бўлган.
Изоҳ (0)