Пойтахтдаги «Истиқлол» саройида «Биз – Мустақиллик фарзандларимиз» хайрия концерти бўлиб ўтди. Бу ҳақда ЎзА хабар берди.
Республика Савдо-саноат палатаси томонидан Ўзбекистон Касаба уюшмалари федерацияси кенгаши, бир қатор ҳамкор ташкилотлар билан биргаликда ташкил этилган тадбирга меҳрибонлик ва мурувват уйлари тарбияланувчилари, махсус мактаб-интернатлар ўқувчилари, Тошкент шаҳри маҳаллаларидаги кам таъминланган оилалар фарзандлари таклиф этилди.
– Муассасамизда 320 нафар бола тарбияланади, – дейди 1-Мурувват уйи тарбиячиси Муяссар Хўжаева. – Уларнинг саломатлигини асраб-авайлаш, ижтимоий ҳимоялаш, интеллектуал салоҳиятини ривожлантириш учун зарур барча шароит яратилган. Бу каби маърифий тадбирлар мамлакатимизда тиббий, ижтимоий имкониятидан қатъий назар, барча болалар бирдек меҳр ва эътибор оғушида эканининг амалдаги яна бир ёрқин намунасидир.
Тадбирда «Марварид» болалар ижодий театр жамоаси ҳамда эстрада ижрочилари иштирокидаги концерт дастури намойиш этилди. Болаларга совғалар топширилди.
Изоҳ (0)