Пойтахтда жисмоний имконияти чекланган ёшлар ўртасида паралимпия ўйинлари бўлиб ўтди, деб хабар бермоқда ЎзА.
«Соғлом бола йили» Давлат дастури ижроси доирасида Ўзбекистон миллий паралимпия ассоциацияси томонидан қатор вазирликлар, давлат ва жамоат ташкилотлари билан ҳамкорликда ташкил этилган мусобақада мамлакатнинг турли ҳудудларидаги махсус мактаб-интернатларда тарбияланаётган 100 нафарга яқин ўғил-қиз теннис, стол тенниси, қиличбозлик, параканоэ, енгил атлетика ва ўқ отиш спорт турлари бўйича ўзаро куч синашди.
– Жисмоний имконияти чекланган ёшларни ҳар томонлама қўллаб-қувватлашга қаратилган бундай тадбирлар алоҳида эҳтиёжли ўғил-қизларнинг ўзини жамиятнинг ҳақиқий аъзоси деб ҳис этишига ҳамда эртанги кунга бўлган ишончини янада мустаҳкамлашга хизмат қилади, – дейди енгил атлетика бўйича Ўзбекистон паралимпия терма жамоаси бош мураббийи Сардор Абдухолиқов.
– Бундай мусобақалар спортга бўлган қизиқишимизни оширади, олдимизга қўйган мақсадларимизга эришишимизда катта куч-ғайрат бағишлайди, – дейди мусобақа ғолиби, бухоролик Марат Зарипов. – Келажакда жаҳон ареналарида ҳам Ватанимиз шарафини муносиб ҳимоя қилиш ниятидаман.
Мусобақа якунида ғолиб ва совриндорларга диплом ва эсдалик совғалари топширилди. Паралимпия ўйинлари санъат усталарининг концерт дастури билан якунланди.
Изоҳ (0)