Ашаддий кашандалар ва ёнғин қурбонлари қонида карбоксигемоглобин миқдори юқори даражада бўлади. Бундай ҳолат денгиз филлари қонида ҳам кузатилиши аниқланди. Бу ҳақда Gazeta.ru хабар берди.
Карбоксигемоглобин — гемоглобиннинг энг кучли заҳар бўлмиш углерод монооксиди (CО) билан қўшилиши натижасида ҳосил бўлади ва уни кислород ташиш имкониятидан маҳрум қилади. Бироқ сўнгги маълумотларга кўра, кам миқдордаги CО фойдали: у шамоллаш жараёнини камайтиради ва ҳужайраларни нобуд бўлишдан сақлайди.
Калифорния университети биологлари денгиз фили қонида карбоксигемоглобин ҳиссаси ўта юқори — 10,4% эканини аниқлашди. Бу кунига 40 та сигарета чекадиган кашанда қонидаги кўрсаткич билан тенг.
Олимларнинг тахмин қилишича, карбоксигемоглобин улардаги шўнғиш билан боғлиқ жараёнга ёрдам беради. 75% ҳолатларда денгиз филлари нафасини ушлаб туради, бу вақтда эса тўқималарга оксидланиш стрессидан зиён етади. Юқори даражадаги CО бундай зарардан тўқималарни ҳимоя қилади.
Изоҳ (0)