Узнетда ўзбек тилидаги сайтлар жуда кам. Ҳаттоки кўпчилик давлат органлари сайтлари ҳам рус тилида юритилади, рус тилидаги бор янгиликлар (press-релизлар) ўзбек тилида бўлмайди ёки сайтга кечроқ жойланади. Бунинг сабаби нима?
Биринчи сабаб — ўзбек мутахассисларнинг сустлиги
Узнет оёққа туриш пайтлари интернетда русийзабон ватандошларимиз жуда фаол бўлган. Энг биринчи сайтлар рус тилида бўлган. Масалан, internet.uz, const.uz форуми ва ҳ.к.
Узнетда рус тилида минглаб сайтлар яратилган ва шулардан бир қисми оммалашиб, ҳозирги кунда у сайтларсиз Узнетни тасаввур қилиб бўлмайди. Масалан, Afisha Media сайтлари, Torg.uz ва бошқалар бир неча йиллар аввал рус тилида иш бошлаган.
Шунча йиллар ўтиб ҳам инерция бўйича русийзабон сайтлар сони ўзбек тилидаги сайтлар сонидан кўп. www.uz’нинг энг машҳур сайтлар ўнлигини қарайлик — шулардан фақат учтаси ўзбек тилидаги талқинини фаол юритади. Қолганларида эса ўзбек тили умуман йўқ, ёки қўл учида қилинган.
Аммо ҳозир тескари жараён амалга ошяпти: бошида рус тилида ишга тушган сайтларнинг ўзбекча кўринишлари очилмоқда, фақатгина ўзбек тилида бўлган ресурслар яратилмоқда.
Ўзбек тилида суҳбатлашувчи IT мутахассислар ҳамжамияти фаоллашмоқда. Бунда ҳамжамият жуда катта ўрин тутади, деб ҳисоблайман. Чунки энг биринчи очилган сайтлар дўстлар, бир-бировига таниш бўлган мутахассислар томонидан очилади.
Иккинчи сабаб — сайт яратувчиларнинг шубҳаси
Ўзбек стартапчиларида шижоат паст. Нега кунига ўнлаб янги сайтлар очилмаяпти? Нега сайт рус тилида эканлигини танқид қиламиз-у, ўзимиз ўзбек тилидаги, ўзимиз хоҳлаган, орзу қилган сайтларни очмаймиз?
Шу ўринда хатоларга бой, веб-дизайн, контент яратиш, SEO’нинг ҳеч қандай принципларини қўлламайдиган, қўпол қилиб айтганда, сифатсиз сайтлар яратувчилари анча фаол. Хостинг бўлмаса UcoZ’да ҳам сайт яратиб, кейин оммалашган сайтлар йўқ эмас.
Нега унда iOS Human Interface Guidelines’ни сувдек ичиб юборган дизайнерлар фаол эмас? Зор идеялар, фикрлар йўқми? Барчаси бор. Аммо рискни бўйнига оладиган марду майдон кам.
Учинчи сабаб — реклама берувчилар
Биздаги энг катта реклама берувчилар — мобил алоқа операторлари ва озиқ-овқат, ичимлик ишлаб чиқарувчилар. Улар жойлаштирган рекламанинг катта қисми — рус тилида. Буни кўрган стартапчи сайти ишга тушганидан кейин пул ишлаш қийин бўлишидан қўрқади.
Тўртинчи сабаб — кадрлар етишмовчилиги
Ўзбек тилида сифатли контент ярата оладиган кадрлар жуда кам, улар саноқли. Улар бошқа, муваффақиятли сайтларда фаолият юритишмоқда.
Муаммонинг ечими — бундай кадрларни етиштириш керак. Starтап устида ишни бошлаш биланоқ масъулиятли, интилувчан ёшларни топиб, маҳсулот бозорга чиққунича уларни тарбиялаш керак. Албатта, бу осон эмас. Бунга куч, вақт, маблағ сарфлаш керак. Тайёр кадр йўқ. Бўлса ҳам — жуда қиммат.
Аммо бу сабаблар — баҳона эмас. UFF, «Sayyod», «Кун», «Дарё», «Стадион» бунга яққол намуна. Бу сайтлар, шунча муаммо бўлишига қарамай, ўз аудиториясини топди. Улар ривожланяпти. Аммо улар кам, жуда-жуда кам.
Масалан, «Sayyod»ни кўпчилик танқид қилади: саводсиз, сайти ажи-бужи, ўзи аҳмоқ, деб. Аммо унинг сайти машҳур. Майли, сайт responsive, pixel-perfect, HTML6, CSS4 бўлмасин. Майли, сайт матнлари устида филология фанлари доктори ишламасин. Майли, хатоларга бой бўлсин. Аммо бўлсин. Юзта шундай сайтдан биттаси ривожланиб, гуллаб кеца, яхши муҳаррир ёллар, сайтини редизайн қилар ва сифатни янги босқичга кўтарар.
Бировни муҳокама қилиш, танқид остига олиш яхши. Аммо сўздан ишга ўтайлик. Янги контент-лойиҳалар яратайлик, янги сервислар очайлик. Ўзбек тилидаги сайтлар сонини, сифатини оширайлик.
Менинг таклифим шу.
Муаллиф: Фарҳод Файзуллаев, «Мулоқот» сайтлар тармоғи раҳбари. Ушбу мақола илк бора ICTNews журналида (№1/2014) чоп этилган.
Изоҳ (0)