Германиянинг GEO-NET Umweltconsulting GmbH компанияси 2014—2015 йилларда Ўзбекистоннинг шамол энергияси салоҳиятини баҳолаб чиқади. Бу ҳақда, Gazeta.uz хабарига кўра, «Ўзбекэнерго» давлат-акциядорлик компанияси истиқболли ривожланиш бошқармаси бошлиғи Равшан Ортиқов маълум қилган.
Ортиқовнинг аниқлик киритишича, Германия компанияси Ўзбекистоннинг олти минтақасида шамол электр энергетикаси салоҳиятини ўрганиш бўйича «Ўзбекэнерго» билан шартнома имзолаган.
Унинг сўзларига кўра, «тадқиқот шамолнинг сониясига 100 метр бўлган йиллик ўртача шиддатида электр энергияни саноат даражасида ишлаб чиқариш имкониятларини аниқлаш мақсадида ўтказилади».
ГЕО-НЕТ тадқиқоти якунлари бўйича Ўзбекистон шамол энергетика қурилмалари (ШЕҚ) паркини ташкил этиш лойиҳасининг техник-иқтисодий асосини ишлаб чиқишга киришилиши режалаштирилган.
Аввалроқ, «Ўзбекэнерго» 2020 йилгача дастлабки қиймати 200 миллион долларга яқин бўлган ШЕҚ паркини қуришни режалаштираётгани ҳақида хабар берилган эди.
«Кун»нинг маълум қилишича, ШЕҚ дастури бўйича ҳар бирининг қуввати 2—3 мегаватт бўлган шамол генераторларини истиқболли ҳудудларда бир вақтнинг ўзида 50 дан 100 мегаваттгача қувват чиқара оладиган қилиб қуришни кўзда тутади.
«Ўзгидромет» маълумотларига кўра, Ўзбекистон ШЕҚларни қуриш учун энг мақбул жойлар сифатида Бухоро, Навоий, Қашқадарё ва Тошкент вилоятлари, шунингдек, Қорақалпоғистон ва бошқа ҳудудлар кўрсатилган.
«Классик энергетика тизими барча эҳтиёжларни қондириш имконига эга эмас ва муаммо ишлаб чиқарилаётган электр энергия ҳажмида эмас, балки уни истеъмолчига етказиб беришда. 20—30 хонадон жойлашган аҳоли пунктига юзлаб километрлик электр линияларини ўтказиш мақсадга мувофиқ эмас, у ўзини 50 йилда ҳам қоплай олмайди», — дейди «Ўзбекэнерго» мутахассиси Анвар Жумаев.
Экспертларнинг ҳисоб-китобларига кўра, қишлоқ аҳолисини электр энергияси билан таъминлаш учун 150 мегаватт қувват етади.
Бироқ кичик аҳоли пунктлари маълум бир ҳудудда тарқоқ жойлашган бўлиб, улар учун маҳаллий энергия қурилмаларини ўрнатиш фойдалироқдир.
Изоҳ (0)