Жиззахда «Барчинойлар танлови» спорт мусобақалари ўтказилди
Жиззах вилоятида умумтаълим мактаблари ўқувчилари ўртасида «Барчинойлар танлови» спорт мусобақалари бўлиб ўтди. Унда спортнинг саккиз тури бўйича 882 нафар ўқувчи қиз иштирок этди. Бу ҳақда ЎзА хабар берди.
Спортнинг волейбол, баскетбол, бадиий гимнастика, стол тенниси, гимнастрада, шахмат-шашка, бадминтон турлари бўйича мусобақаларда Жиззах шаҳри қизлари умумжамоа ҳисобида биринчи ўринни қўлга киритди. Иккинчи ўрин Жиззах, учинчи ўрин Зарбдор туманлари қизларига насиб этди.
«Энг маҳоратли иштирокчи», «Энг интилувчан иштирокчи», «Энг шиддатли жамоа» каби номинациялар бўйича ғолиблар аниқланиб, муносиб рағбатлантирилди.
– Спорт, айниқса, болалар спортини ривожлантиришга кўрсатилаётган эътибор ўз самараларини бераётир, – дейди вилоят халқ таълими бошқармаси бошлиғи Эргаш Жабборов. – Бугунги мусобақада ҳам вилоятнинг энг олис туман ва қишлоқларидан ўқувчилар фаол иштирок этгани бунинг далилидир.
