Американинг йирик IT-компаниялари фойдаланувчиларни огоҳлантирмасдан уларга тегишли маълумотларни ҳукуматга тақдим этишни тўхтатди. The Washington Post хабар беришича, компаниялар, агарда ҳукумат улар билан боғлиқ шахсий маълумотлар билан танишмоқчи бўлса, фойдаланувчилар бу ҳақда олдиндан билиш ҳуқуқига эга, дея таъкидламоқда.
Apple, Microsoft, Facebook ва Google фойдаланувчиларни АҚШ ҳукумати уларнинг маълумотларини олмоқчилиги ҳақида огоҳлантиришнинг доимий амалиётини йўлга қўймоқда, деб ёзади «РИА Новости».
Бироқ бундай хабарномалар суд ёки бошқа давлат органлари томонидан тақиқланса, истисно ҳолати бўлиши мумкин. Бундан ташқари, хорижий разведкалар устидан назорат бўйича АҚШ суди томонидан тасдиқланган, шунингдек федерал қидирув бюроси талабномалари билан сўралган маълумотларга компанияларнинг бундай сиёсати тегишли бўлмайди.
Прокуратура ходимларининг огоҳлантиришича, бу тергов ишларига ҳалақит бериши мумкин: эҳтимолий жиноятчилар ўз айбларининг рақамли далилларини ҳуқуқни ҳимоя қилиш органлари рухсат олгунга қадар йўқ қилиб ташлашга улгуриши мумкин.
Изоҳ (0)