Испаниялик ўғрилар қоятошга чизилган 5000 йиллик суратни вайрон қилди
El Mundo газетасининг хабар беришича, Испаниянинг жанубида қоятошга туширилган қадимий сурат уни қўпориб олишга ҳаракат қилган ўғрилар томонидан вайрон қилинди. Андалузияда жойлашган миллий боғга ташриф буюрганлар ёши 5000 йилдан юқори бўлган қоятош суратининг тамоман йўқ қилинганини кўриб қолган. Номаълум шахслар суратни ғор деворидан қўпориб олишга ҳаракат қилган, бироқ уларнинг барча уринишлари самарасиз бўлиб чиққан. Натижада ЮНЕСКОнинг номоддий мерослар рўйхатига киритилган мазкур сурат қайта тикланмас даражада барбод бўлган.
Мазкур ғор бундан 41 йил аввал саёҳатга чиққан бир гуруҳ болалар томонидан топиб олинган эди. Улар орасида айни вақтдаги шаҳар ҳокими ҳам бўлган. Объектга шунинг учун ҳам «мактаб ўқувчилари ғори» деган ном берилган. Қоятошда эса қўллари узун эркак кишининг сурати бўлган.
Барбод қилинган сурат Испаниянинг Ўрта ер денгизи соҳилларидаги бир неча юз дона ана шундай ёдгорликлар сирасидан эди. Хаэн вилоятида бундан ташқари, ЮНЕСКО номоддий мерослар рўйхатига кирувчи яна 42 та объект мавжуд. Мутахассисларнинг фикрича, ёдгорликларнинг аксарияти муносиб даражада қўриқланмайди.
