«Тошкент» халқаро аэропортида ўтган йилнинг ёзидан бошлаб чет элдан ташриф буюрган йўловчилар учун амал қилган аравачалардан фойдаланишнинг жетонли тизими бекор қилинди. Бу ҳақда Хусусийлаштириш, монополиядан чиқариш ва рақобатни ривожлантириш давлат қўмитасининг Истеъмолчилар ҳуқуқларини ҳимоя қилиш бошқармаси Gazeta.uz’га хабар қилди.
Маълум бўлишича, қўмитага Ўзбекистонга хориждан келган ва юк ташиш билан боғлиқ ноқулайликларга учраган фуқаролардан мурожаатлар тушган.
Амалда бўлган тизим бўйича йўловчи аравачадан фойдаланиш ҳуқуқини берувчи жетон учун 3000 сўм миқдорида гаров пулини қолдириши керак эди. Пулни қайтариб олиш учун аравачани яна жойига келтириб қўйиш лозим, айнан шу нарса ноқулайликни келтириб чиқарган.
Фуқаролар аризаларини кўриб чиқиб, қўмита «Ўзбекистон ҳаво йўллари» Миллий авиакомпаниясига мурожаат этди ва вазиятни йўловчилар фойдасига ҳал қилди.
Изоҳ (0)