Бугун Россия президенти билан ўтказилган тўғридан-тўғри мулоқот чоғида АҚШ Марказий разведка бошқармаси собиқ ходими Эдвард Сноуден инглиз тилида видеосавол билан мурожаат қилди. Бу ҳақда «РИА Новости» хабар берди.
Сноуденнинг «Россия миллионлаб кишиларнинг суҳбатларини тинглаш, сақлаш ва таҳлил қилиш билан шуғулланадими ва президент оммавий назоратни адолатли ва ўринли деб ҳисоблайдими?» — деган саволига Путин Россия махсус хизмати тинглаш ва кузатиш воситаларидан суд санкцияси билан қонунга мувофиқ фойдаланишини таъкидлади.
«Суд орқали алоҳида шахсни кузатиш ҳақида рухсат олиш талаб этилади. Қонун бўйича, оммавий кузатиш ҳақида гап ҳам бўлиши мумкин эмас», — деди Путин.
Эслатиб ўтамиз, Сноуден 2013 йили АҚШ ва Британия махсус хизматларининг ноқонуний фаолияти ҳақида Washington Post ва Guardian нашрларига ахборот берган эди. МХАнинг сўзларига кўра, журналистлар ихтиёрига ана шундай маълумотлардан 200 мингтаси келиб тушган бўлиши мумкин. Айнан шундан сўнг Сноуден Гонгконгга учиб кетган. Ўтган йилнинг 23 июнида эса Москвадаги «Шереметьево» аэропортининг транзит ҳудудида қўним топган. 2013 йилнинг августида у Россияда 1 йил муддатга вақтинчалик жойлашган эди.
Изоҳ (0)