60% америкаликларнинг фикрича, Обама уларга муҳим масалаларда ёлғон гапиради

Американинг Fox News телеканали жамоатчилик фикрини билиш учун сўров ўтказди. Унинг натижаларига кўра, америкаликларнинг тахминан 60 фоизи АҚШ президенти Барак Обама уларни мамлакат учун муҳим масалаларда алдайди, деб ҳисоблайди. Бу ҳақда «ИТАР-ТАСС» хабар берди.

Сўровда қатнашганларнинг 37 фоизи Оқ уй раҳбари «кўп ҳолларда» ёлғон гапиради, деган бўлса, 24 фоизи Обама «баъзан» ёлғон сўзлашига ишончи комил. 20% америкаликлар президент «камдан-кам» ҳолларда ёлғонлайди, деб ҳисоблайди. АҚШ аҳолисининг атиги 15 фоизи Обамага тўлиқ ишонади: уларнинг фикрича президент доим ҳақ сўзлайди.

Республика мухолифати, шунингдек баъзи консерватив ОАВлар томонидан Обама кўп марта ҳақиқатдан йироқ бўлган баёнотларни берганликда айбланган.

Умуман, Обаманинг президентлик лавозимидаги фаолиятидан америкаликларнинг 42 фоизи мамнун бўлса, 51 фоизи норози.

13—15 апрель кунлари телефон орқали ўтказилган сўровда АҚШнинг мингдан ортиқ  катта ёшли фуқаролари қатнашган.