Google учувчисиз учадиган мосламалар чиқарувчи компанияни Facebook’дан олдин сотиб олди
Google компанияси Titan Aerospace — учувчисиз учадиган мосламалар ишлаб чиқарувчисини сотиб олди. Миш-мишларга кўра, уни Facebook харид қилиш ниятида бўлган. Бу ҳақда The Wall Street Journal хабар бермоқда.
Titan Aerospace’нинг учувчисиз мосламалари қуёш энергиясида ишлайди ва ҳавода беш йилгача қолиши мумкин. Компания ўз маҳсулотларининг илк нусхаларини ўтган йили намойиш этган. Titan Aerospace вакилларининг таъкидлашича, Solara 50 ва Solara 60 орбита йўлдошлари операцияларининг кўпчилигини бажара олади.
Олди-сотди душанба куни ниҳоясига етган, бироқ харид суммаси ошкор этилмаяпти. Titan Aerospace’нинг 20 нафар ходими расман Google жамоасига қўшилади, бироқ яқин келажакда Нью-Мехикода ишлашда давом этади.
Google X махфий лабораторияси ўтган йилнинг июнида Project Loon лойиҳаси ҳақида оммага маълум қилган эди. Унинг ёрдамида компания бутун сайёрани, шу жумладан қишлоқ жойлар, чўллар, денгиз ва бошқа олис ҳудудларни интернет билан таъминламоқчи.
Facebook ҳам ўтган ойда интернетни ҳамма жойга бирпасда тарқатиш учун учувчисиз учадиган мосламалардан ҳамда бир нечта сунъий йўлдошлардан фойдаланмоқчи экани ҳақида хабар тарқатган эди.
