8 апрель куни Тошкентда машиналар орқали ўқиладиган йўл ҳужжатлари ва саёҳатчи идентификациясини бошқариш бўйича ҳудудий семинар ўз ишини бошлади. У 10 апрелга қадар давом этади, дея хабар берди UzDaily.
Семинар Фуқаролар авиацияси халқаро ташкилоти (ИCАО), Европада хавфсизлик ва ҳамкорлик ташкилоти (ЕХҲТ) томонидан Ўзбекистонда биометрик паспорт тизимини жорий қилишда пудратчи вазифасини ўтаган Франциянинг Oberthur Technologies компанияси ҳамкорлигида ташкил қилинди.
Семинарда Ўрта Осиё ва Шарқий Европа мамлакатлари ҳукумат делегациялари, шунингдек, электрон паспортлар учун қурилма ва дастурий таъминот ишлаб чиқарувчи компаниялар қатнашди.
Дунё бўйича паспортли чиплар 2001 йил 11 сентябрь воқеаларидан сўнг йўловчилар ташиш хавфсизлигини ошириш мақсадида муомалага киритилган.
Ўзбекистон эса 2011 йил ноябрида биометрик паспорт ишлаб чиқаришни бошлади. Ўзбекистон Давлат персоналлаштириш маркази директори Нажмиддин Тўрахўжаевнинг маълум қилишича, кунига 16 мингта паспорт ишлаб чиқарилади. Айни пайтгача 5 миллионта паспорт чиқарилди. «Ўзбекистонда жами 20 миллион киши паспорт билан таъминланиши керак», — деди у.
Изоҳ (0)