Гонконгда 3,7 миллион долларлик санъат асарини ахлатга ташлаб юборишди

Машҳур хитойлик рассом Цуй Жучжоу мўйқаламига мансуб бўлган, кимошди савдосида 3,7 миллион долларга сотилган сурат Гонконгдаги беш юлдузли меҳмонхонада йўқолиб қолди. «Қорли тоғлар» деб аталган бу картинани меҳмонхона фаррошлари ахлатга ташлаб юборишган, деб ёзади South China Morning газетаси.

Poly Auction аукцион уйи Grand Hyatt отелида кимошди савдосини ўтказаётган бўлган. Кузатув камералари орқали тасвирга туширилган видеоёзувдан аниқланишича, ўраб қўйилган картинани фаррошлар чиқиндиларга қўшиб олиб чиқиб кетишган.

Суратни олиб келиш учун дарров полициячилар жўнатилган, аммо улар ҳам катта ахлат уюми орасидан картинани топа олишмаган. Grand Hyatt маъмурияти эса санъат асарининг йўқолганлиги учун ҳеч қандай жавобгарликни ўз зиммасига олмаслигини маълум қилган.

1944 йилда туғилган Цуй Жучжоу картиналари Осиёдаги энг қимматбаҳо замонавий санъат асарларидан ҳисобланади. Аввалроқ унинг айни шу услубда ишланган бошқа асари – «Қорли манзара» аукционда 23,8 миллион долларга сотилган. 2011 йилда эса Жучжоу мўйқаламига мансуб «Нилуфар» картинасини Гонконгдаги Christie's кимошди савдосида 15,8 миллион долларга сотиб олишган.