2014—2050 йилларда дунёнинг 40 дан ортиқ мамлакатида аҳоли сони камайиб кетади. Бу ҳақда 7 апрель куни БМТнинг Нью-Йоркдаги бош қароргоҳида ўз ишини бошлаган Аҳоли ва ривожланиш бўйича комиссиянинг 47-сессиясида БМТ Бош котиби Пан Ги Мун ўзининг жаҳон демографик тенденцияларига оид маърузасида маълум қилди.
Anhor.uz хабар беришича, 2014—2050 йилларда Германия, Хитой, Польша, Россия Федерацияси, Руминия, Сербия, Таиланд, Украина ва Япония аҳолисининг камайиб кетиш эҳтимоли энг юқоридир. Шарқий Европа, Шарқий, Жануби-Шарқий ва Ғарбий Осиёдаги кўплаб бошқа давлатлар аҳолиси учун ҳам бундай хавф мавжуд.
Африка аҳолиси эса, аксинча кўпайиб кетиши кутилмоқда. Мутахассислар 2050 йилгача қитъа аҳолисининг ўсиш суръати Жанубий Американикидан 6 марта, Осиёникидан 15 марта ошиб кетишини таъкидламоқда.
Дунё аҳолиси 1994 йилдаги 5,7 миллиарддан 2014 йилда 7,2 миллиардгача кўпайди. Ер аҳолисининг ярмидан кўпи — 3,9 миллиард киши шаҳарларда яшайди. Пан Ги Мун шаҳарликлар сони ўсишда давом этишини маълум қилди.
2014 йилнинг 1 январь ҳолатига кўра, Ўзбекистонда доимий аҳоли сони 30 миллион 488 мингдан зиёд кишини ташкил қилди ва 2013 йил январь—декабрь ойларида 495,1 минг кишига ёки 1,7 фоизга кўпайди. 15,5 миллиондан ортиқ киши — шаҳар (умумий аҳоли сонининг 51 фоизи) ва 15 миллионга яқин киши — қишлоқ жойларида (49 фоизи) истиқомат қилади.
Изоҳ (0)