Самарқанд шаҳридаги Ўзбекистон маданияти тарихи музейида Амир Темур ва темурийлар тарихини ўрганишга бағишланган илмий-амалий конференция ўтказилди, деб хабар бермоқда ЎзА.
Халқаро Амир Темур жамғармаси Самарқанд вилояти бўлими ва Самарқанд давлат музей-қўриқхонаси ҳамкорлигида ташкил этилган анжуманда тарихчи олимлар, ёш тадқиқотчилар, давлат ва жамоат ташкилотлари вакиллари қатнашди.
– Темурийлар даврига оид муҳим ва қимматли манбалардан бири бу араб муаррихи Аҳмад ибн Арабшоҳнинг 1436—1437 йилларда ёзилган «Темур тарихи ажойиботлари» асаридир, – дейди тарих фанлари доктори, профессор Убайдулла Уватов. – Ушбу асарда бошқа манбалардан фарқли равишда Соҳибқироннинг сурати ва сийрати жуда чиройли ва аниқ тасвирланган. Унда Амир Темурнинг хизматлари, бунёдкорлик ишлари, олиму фузалолар билан суҳбати ҳақида ғоят қимматли маълумотлар келтирилган. Бугунги кунда ушбу асарни янада чуқурроқ ўрганиш ва бошқа манбалар билан солиштирган ҳолда тадқиқ қилиш олимларимиз олдида турган муҳим вазифалардан биридир.
Конференцияда темурийлар даврида амалга оширилган бунёдкорлик ишлари, илм-фан, маданият ва санъат ривожига қаратилган эътибор хусусида олим ва тадқиқотчиларнинг маърузалари тингланди.
Шунингдек, Қашқадарёда ҳам Амир Темур таваллудининг 678 йиллиги муносабати билан Амир Темур ҳаёти ва фаолиятининг комил инсон тарбиясидаги ўрни мавзусида илмий-амалий конференция бўлиб ўтди.
ЎзАнинг маълум қилишича, вилоят ҳокимлиги ва Халқаро Амир Темур жамғармаси ҳамкорлигида ташкил этилган тадбирда вилоятдаги олий ўқув юртлари профессор-ўқитувчилари, тарихчи олимлар, ёш тадқиқотчилар, давлат ва жамоат ташкилотлари вакиллари қатнашди.
Анжуманда «Мустақиллик йилларида Амир Темур ва темурийлар даври тарихининг тадқиқ этилиши», «Араб манбаларида Амир Темур сиймоси», «Соҳибқироннинг оилавий ҳаёти» мавзуларида маърузалар тингланди.
Анжуманда Амир Темур ва темурийлар ҳақидаги араб ва форс манбаларини таржима қилиш ва изоҳлар билан чоп этиш, мазкур тарихий асарларни кенг ўқувчилар оммасига мўлжаллаб нашрга тайёрлаш, «Амир Темур йўллари бўйлаб» лойиҳаси асосида экспедиция ташкил қилиш каби таклифлар билдирилди.
Изоҳ (0)