Монитордаги курсорни фикр кучи билан ҳаракатлантирувчи технология ишлаб чиқилди

Финляндиянинг Ювяскюля университети олимлари экрандаги предметларни фақатгина фикр кучи билан ҳаракатлантира оладиган технологияни кенг оммага намойиш этдилар. Бу ҳақда «ЮЛЕ» телекомпанияси хабар берди, деб ёзади «ИТАР-ТАСС».

Технологияни Ювяскюля университети тадқиқотчиси Ярно Микконен шундай тушунтиради: «Миядаги нейронлар электр тўлқинларини ҳосил қилади. Инсон бошига ўрнатилган махсус датчик эса бу тўлқинларни ушлаб олиб, компьютерга юборади». Шундан кейин, унинг айтишича, компьютер ўзига бу сигнал қаердан келаётганлигини англаб олади, сўнг эса экрандаги объектни қайси йўналишда ҳаракатлантириш топширилганлигини аниқлайди.

Микконеннинг таъкидлашича, бу жараёнда компьютер ҳам, инсон ҳам тегишли дастурдан фойдаланиб, биргаликда ишлашни ўрганиб олишади.

«Экрандаги квадратни силжитиш учун анча-мунча меҳнат қилдим, – дейди тажрибада иштирок этган талаба Яни Икяхеймонен. – Бунга сарф этиладиган ақлий кучни бемалол жисмоний меҳнат билан таққослаш мумкин».

Таъкидлаш керакки, Икяхеймонен бошида бу тажрибага ишонмасдан, киноя билан қатнаша бошлаган эди. Аммо ўзи экрандаги курсорни қўзғата олганини кўриб, ҳаяжонга тушди. «Бунақаси фақат кинода бўлади, деб ўйлагандим», – дейди у.