Апрель ойида ёққан қор кўпчиликни саросимага солиб қўйди. Об-ҳаводаги бундай ҳолат нима сабабдан рўй берганини аниқлаш мақсадида Ўзгидрометга мурожаат қилдик.
Ўзбекистон Республикаси Гидрометеорология хизмат маркази раҳбари Шерзод Мухторовнинг «Дарё» нашрига маълум қилишича, 7 апрель куни Ўзбекистон ҳудудига Волгабўйи ҳудудларидан нам ва нисбатан совуқ ҳаво кириб келди. Илиқ ҳароратда республика бўйлаб 5—10 мм миқдорида ёмғир ёғди.
Жанубий Қозоғистон (Чимкент)дан келган совуқ ҳаво ҳисобига Тошкент вилоятидаги баъзи туманларда эрталабки соат 6 ва 11 оралиғида ёмғирнинг қорга айланиши кузатилди.
«Апрелда қор ёғиши Тошкентда камдан-кам кузатилади, бироқ буни ғайриодатий деб ҳам бўлмайди», — деди Шерзод Мухторов. Маълум бўлишича, сўнгги йилларда Тошкентда 2011 йилнинг 3 апрели ва 2005 йилнинг 5—6 апрель кунларида апрель қори қайд этилган. Ёмғирнинг қорга айланиши энг кеч содир бўлган йил эса 1989 йилдир. Ўша йилнинг 30 апрелида қор кузатилган.
Таъкидлаш жоиз, апрель ойида энг совуқ ҳаво 1939 йилда (-2 даража), энг иссиқ ҳаво 1955 йилда (+32 даража) қайд этилган.
«Дарё» нашри Ўзгидрометга тақдим этилган маълумот учун миннатдорчилик билдиради.
Изоҳ (0)