Жиззах шаҳрида баъзи интернет-кафеларнинг фақат тижорат мақсадини кўзлаб, болалар тарбиясини эътибордан қочираётгани жамоатчилик эътирозига сабаб бўлмоқда. ЎзАнинг маълум қилишича, болаларнинг ёши ва миллий қадриятларга тўғри келмайдиган компьютер ўйинлари ўйнашга йўл қўйилаётган ҳолатлар аниқланиб, тегишли чоралар кўрилмоқда.
Хабарда компьютер ўйинларининг миллий қадриятларга мос келиш-келмаслиги қандай аниқланаётгани, шунингдек, мос келмайдиган ўйинларни тақдим этаётган муассасаларга нисбатан айнан ким томонидан қандай чоралар кўрилаётганига аниқлик киритилмаган, деб ёзади «Кун» нашри.
«Ахборот-коммуникация технологиялари ривожланган бугунги даврда болаларнинг интернетга киришини чеклаб бўлмагани каби уларнинг нимани ўрганаётганини ҳам тўлиқ назорат қилиш осон эмас. Ёшларни интернет тармоғи орқали кириб келаётган бузғунчи ғоялардан, ‘оммавий маданият’ таъсиридан ҳимоя қилишнинг тўғри йўли уларнинг интернет саводхонлигини ошириш, ижтимоий ҳаётдаги ўрни ҳақидаги тушунчаларни бойитишдир», – деб ёзади ЎзА.
Жиззах шаҳридаги «Олмазор» маҳалла фуқаролар йиғини раиси Норбуви Шамшиеванинг сўзларига кўра, айни пайтда ҳудуддаги битта интернет-кафе ва битта компьютер ўйинлари шохобчаси фаолияти ўрганилиб, уларни ўқувчиларнинг бўш вақтини янада мазмунли ўтказадиган масканга айлантириш юзасидан таклифлар берилган.
Изоҳ (0)