Ўзбекистонда 31-янар куни куни эрталаб кузатилган туман бир қатор аэропортларда рейслар кечикишига сабаб бўлди. Бу ҳақда Uzbekistan Airports матбуот хизмати хабар берди.
Хусусан, Фарғона аэропортидаги қуюқ туман туфайли — кўриш масофаси 50 метр атрофида бўлиб, Ural Airlines авиакомпаниясининг Москвадан учиб келган SVR-8317 рейси аэропортга қўна олмаган ва соат 07:32 да Намангандаги захира аэродромига йўналтирилган. 227 нафар йўловчи Намангандан Фарғонада ерусти транспортида олиб келинган.
Шунингдек, об-ҳаво шароитининг ноқулайлиги сабаб Uzbekistan Airways авиакомпаниясининг Тошкент—Фарғона йўналиши бўйича учиши керак бўлган рейси кечиктирилган.
Бундан ташқари, қуюқ туман сабаб Uzbekistan Airways’нинг Бухоро—Тошкент йўналиши бўйича учиши керак бўлган HY-024 рейси кечиктирилган. Бортида 138 йўловчиси бўлган самолёт соат 09:20 да учиши керак бўлган, бироқ у ўз парвозини соат 11:29 да амалга оширган. Айни вақтда аэропорт штат режимида ишламоқда.
Эслатиб ўтамиз, 25 январь куни Нукус—Тошкент йўналиши бўйича HY16 рейси манзил аэропортида кўриш имконияти ёмонлиги сабабли Навоийдаги муқобил аэродромга жўнаб кетганди.