Жонс Ҳопкинс университети маълумотларига кўра, айни пайтда дунё бўйича коронавирусга чалинганлар сони 136 727 030 кишига етган. Шуларнинг 2 947 846 нафари вафот этган. Касалланганлар сони бўйича юқори бешликдан АҚШ (31,2 миллион), Ҳиндистон (13,6 миллион), Бразилия (13,5 миллион), Франция (5,1 миллион) ва Россия (4,6 миллион) ўрин олган.
Европа ҳудудида пандемия бошидан буён COVID-19 оқибатидаги ўлимлар сони 1 миллионтадан ошди. 12 апрель ҳолатига Европанинг 52 мамлакатида коронавирусдан вафот этганлар 1 000 288 кишини ташкил қилган.
Жаҳон соғлиқни сақлаш ташкилоти эпидемиологи Мария ван Керховенинг айтишича, «айни пайтда биз пандемиянинг оғир нуқтасида турибмиз».
Коронавируснинг ўтган йил охирида Британияда аниқланган штамми COVID-19’нинг оғирроқ кечишига олиб келмайди. The Lancet Infectious Diseases ва The Lancet Public Health тиббий журналларида чоп этилган иккита тадқиқот муаллифлари шундай хулосага келди.
«Биз касалликнинг кечиш оғирлиги ва вируснинг келиб чиқиши ўртасидаги боғлиқликни тасдиқловчи далилларни аниқламадик», — дейилади The Lancet Infectious Diseases журналидаги мақолада. Иккинчи тадқиқот муаллифлари ҳам «B.1.1.7 штаммида симптомлардаги ёки касалликнинг давомийлигидаги ўзгаришлар» аниқланмаганини қайд этди.
Бундан ташқари, олимлар «британча» штамм билан касалланиб ўтган беморларда қайта касалланиш ҳолатлари коронавируснинг бошқа вариантларига нисбатан кўпроқ ёки камроқ учраши борасида аниқ бир далилларни аниқламади. Шу сабабли мавжуд вакциналар «британча» штаммга қарши самарали бўлиши керак, деб ҳисоблайди улар. Айни вақтда тадқиқотлар вируснинг ушбу вариант юқори даражада юқумли эканини тасдиқлади.
АҚШ Мудофаа вазирлиги — Пентагон олимлари COVID-19’ни симптомлар пайдо бўлгунига қадар аниқлай оладиган микрочипни яратди. У қон таркибини назорат қилиш имконини беради ва организмга коронавирус келиб тушиши билан тезликда сигнал беради.
Армия инфекционист шифокори, истеъфодаги полковник Мэтт Хепбёрн аниқлик киритишича, қурилма матосифат гелдан иборат бўлиб, танага ўрнатилгач, доимий равишда қонни текшириб туради.
«Сиз уни тери остига киритасиз ва у тана ичида юз бераётган кимёвий реакцияларни кузатиб боради, сизга сигнал берса, демак, эртага сизда симптомлар пайдо бўлиши мумкин», — деди у.
Хепбёрннинг сўзларига кўра, вирус қонга келиб тушганидан кейин уч-беш дақиқа ичида сигнал берилади. Натижада ташхис вақти қисқаради, бу эса даволаниш самарадорлигини оширади.
Шунингдек, Пентагон вакили чип ёрдамида муассаса одамларнинг жойлашган жойи ҳақидаги ахборотни ёки бошқа маълумотларни қўлга киритмоқчи эмаслигини таъкидлади. Қурилма айни пайтда ишлаб чиқиш жараёнининг сўнгги босқичида.
Жанубий Африка, Буюк Британия, Эфиопия, Бразилия ва Ангола университетлари олимлари Ангола аэропортидаги саёҳатчиларда коронавируснинг 34 та мутациядан иборат янги штаммини аниқлади.
«Биз бу янги штаммни юқтириб олиш билан боғлиқ атиги учта ҳолатни аниқлаган бўлсак-да, бу зудлик билан тадқиқот олиб боришни талаб этади, чунки ушбу штамм аниқланган мамлакатда эпидемия аҳамиятли даражада қайд этилмаган ва вируснинг мамлакат ичида ва ташқарисида тарқалишининг олдини олиш учун жамоатчилик соғлиғини сақлаш чоралари етарлича кўрилмайди», — дея огоҳлантирди олимлар.