Марказий сайлов комиссиясининг собиқ раиси Мирзо-Улуғбек Абдусаломов Ўзбекистон Конституциявий суди судьяси этиб сайланди. Тегишли қарор Олий Мажлис Сенатининг 5 февраль куни бўлиб ўтган навбатдаги ялпи мажлисида қабул қилинган.
Мирзо-Улуғбек Абдусаломов 2005 йилдан буён Марказий сайлов комиссиясига раҳбарлик қилиб келган. Аввалроқ депутатлар Қонунчилик палатаси депутатлари унинг МСК раиси сифатидаги, шунингдек, комиссиянинг яна 6 нафар аъзосининг ваколати тугатилишини маъқуллаганди.
Мажлисда шунингдек, Марказий сайлов комиссиясининг 8 нафар янги аъзоси тасдиқланган. Улар орасида Олий Мажлис Сенати раисининг ўринбосари Зайниддин Низомхўжаев ҳамда адлия вазири ўринбосари Баҳром Қўчқоров ҳам бор.
Аввалроқ Марказий сайлов комиссиянинг раиси Мирзо-Улуғбек Абдусаломовнинг бошқа ишга ўтиши муносабати билан унинг ўрнига Сенат раиси ўринбосари Зайниддин Низомхўжаев сайланиши, унга эса адлия вазири ўринбосари Баҳром Қўчқоров ўринбосар бўлиши кутилаётгани ҳақида хабар берилган эди.