Россиянинг Амурск вилоятида яшовчи 23 ёшли Магомед, Голливуд юлдузи Жонни Деппга қуйиб қўйгандек ўхшайди. У Янги йилда қариндошлари олдига Жек Читтак кўринишида келганидан кейин унинг юлдузга нақадар ўхшашлигига эътибор берила бошланган. Онасининг севимли қаҳрамони бўлгани туфайли йигит байрам куни айнан ушбу образни танлаган.
Магомед Янги йил кечаси яқинларидан ташқари кўчадагиларга ҳам яхши кайфият улашган. Мазкур образда кўчага чиққанидан кейин ҳар иккинчи йўловчи унинг олдига келиб бирга суратга тушишни сўраган. Россиялик йигит, шунингдек, ўзи ҳам «Кариб денгизи қароқчилари»ни яхши кўриши сабаб унинг барча қисмларини томоша қилгани, қаҳрамоннинг эсда қоларли ва ёрқин образи уни таъсирлантирганини маълум қилган.
Фильм қаҳрамон ва Магомеднинг қиёфасидан ташқари, бошқа ўхшашликлари ҳам бор. У ҳам Жек сингари ҳаётини денгиз билан боғлаган. 2017 йилда Владивостокда жойлашган, Г.И. Невелский номидаги денгиз давлат университетини тамомлаган.
Айни вақтда капитан ёрдамчиси бўлиб ишлайдиган Магомед фаолиятини санъатда давом эттиришни исташи ҳамда яқин орада ўзини Дедпул образида синаб кўрмоқчи эканлигини таъкидлайди.