Ўзбекистондаги 300 дан ортиқ мактаб қўлбола печлар ёрдамида иситилмоқда — Халқ таълими вазирлиги

Ўзбекистонда 162 та мактаб ва 156 та мактаб филиали қўлбола печлар орқали иситилади. Бу ҳақда Халқ таълими вазирлиги ахборот хизмати раҳбари Лайло Рустамова АОКАда ўтказилган брифингда маълум қилди.

Маълум қилинишича, Ўзбекистон бўйича мавжуд жами 10 008 та умумтаълим мактаби ва ихтисослаштирилган мактаб интернатининг 3310 таси табиий газ манбалари орқали иситилмоқда. Шунингдек, мактабларнинг 23 таси суюқ ёқилғи, 6671 таси кўмир (брикет), 4 таси электр токи орқали иситилади.

Уларнинг иситилиш тури қуйидагича:

• 1036 та мактаб — марказлашган иссиқлик тармоғи орқали;
• 8810 таси — локал иситиш тармоғи орқали;
• 162 таси — қўлбола (буржуй) печлар орқали.

Бундан ташқари, таъкидланишича, жами 1196 та мактаб филиалининг 118 таси табиий газ, 1 таси суюқ печ ёқилғиси, 1062 таси кўмир (брикет) ёқилғиси, 15 таси электр токи манбаларидан фойдаланиб иситилади.

«Қўлбола печлар орқали иситилаётган мактабларда ўқувчиларнинг ис газидан заҳарланиши эҳтимоли юқори. Чунки қўлбола печлар синф хоналарининг ички қисмига, ўқувчиларга яқин қилиб ўрнатилган», — дейди вазирлик расмийси.

Эслатиб ўтамиз, 2020 йилнинг июнь ойида Қашқадарё вилояти халқ таълими бошқармаси бошлиғи Абдуғани Ҳимматов вилоятдаги мавжуд 1144 та мактабнинг 294 таси қиш мавсумида ҳалигача «буржуйка» печда иситилаётганини маълум қилганди. Июль бошида эса халқ таълими вазири Шерзод Шерматов ижтимоий тармоқда эълон қилган Тошкентдаги янги таъмирланган мактаблар ҳақидаги видеороликдан кейин «Қачон вилоятда бўлади?» деб қолдирилган изоҳларга жавоб бериб, мактабларга шароит яратишда кўп масала ҳокимларга боғлиқ эканини айтганди. Шунингдек, Ўзбекистондаги салкам 1200 та мактаб филиали фаолияти тугатилиши ва улар босқичма-босқич равишда тўлақонли мактабларга айлантирилиши хабар қилинган.