«Навоийча тендер». Бир неча млрд сўмлик давлат буюртмаларини тендер буюртмачиси раҳбари оиласига тегишли корхона қўлга киритгани маълум бўлди

Навоий вилоят ҳокимлиги «Ягона буюртмачи хизмати» инжиниринг компанияси раҳбари Баҳодир Мансуров оиласига тегишли қурилиш корхонаси бир неча миллиардлик давлат буюртмаларини қўлга киритган. Бу ҳақда очиқ маълумотларни ўрганиш асосида «Давлетовуз» Telegram канали хабар берди.

Маълум қилинишича, 2019 йилнинг 19 мартидан Навоий вилоят ҳокимлиги «Ягона буюртмачи хизмати» инжиниринг компаниясига, яъни вилоятдаги қурилишлар бўйича асосий давлат буюртмачисига Мансуров Баҳодир Пўлатович раҳбар этиб тайинланган. Бир неча миллиард сўмлик давлат буюртмаларини қўлга киритган «Меҳрангез Б-2002» МЧЖ Баҳодир Мансуров оиласига тегишли бўлган.

Навоий вилояти Кармана тумани «Боғишамол» МФЙ ҳудудидаги 30-сонли мактабни реконструкция қилиш (240 ўринли ўқув блоки қуриш) объекти бўйича тендер комиссияси йиғилиши 2020 йилнинг 3 июнида ўтказилган бўлиб, қиймати 2 миллиард сўмлик мазкур объектнинг тендер ҳужжатларига Баҳодир Мансуров комиссия раиси ўринбосари сифатида қўл қўйган. Маблағлар Инқирозга қарши курашиш жамғармасидан ажратилган.

Бундан ташқари, Навбаҳор тумани 8-сонли мактабгача таълим муассасаси биносини мукаммал таъмирлаш (125 ўринли блок қурилиши) объекти ҳам «Меҳрангез Б-2002» МЧЖга берилган. Деярли 2,8 миллиард сўмлик ушбу объект бўйича 2019 йилнинг августида ўтказилган танлов комиссиясида Баҳодир Мансуров комиссия раиси бўлган.

Ҳозирги кунда «Меҳрангез Б-2002» компаниясининг барча улуши Мансуров Саодат Омоновнага (маълумотларга кўра турмуш ўртоғи) тегишли бўлиб, унга Мансуров Меҳрангез Баҳодирович (маълумотларга кўра фарзанди) раҳбарлик қилади.

Маълумот учун, Навоий вилоят ҳокимлиги «Ягона буюртмачи хизмати» инжиниринг компанияси бош муҳандиси бўлиб ишлаган А.Турдиев ҳужжатларга 2020 йилнинг июль ойидан 2021 йилнинг январигача компания директори в.б. сифатида имзо қўйиб келган. Январь ойидаги охирги актуал маълумотлар, жумладан, Давлат статистика қўмитаси сайтининг корхона ва ташкилотлар тўғрисидаги маълумотлар базасида эса Баҳодир Мансуров яна Навоий вилоят ҳокимлиги «Ягона буюртмачи хизмати» инжиниринг компанияси раҳбари сифатида кўрсатиб ўтилмоқда, дейилади «Давлетовуз» хабарида.

«Давлетовуз», шунингдек, Навоий вилоятидаги яна бир ҳолатга эътибор қаратди. Очиқ маълумотларга кўра, Навоий вилоят ҳокимлиги «Ягона буюртмачи хизмати» инжиниринг компанияси Баҳодир Мансуров раҳбарлик қилган даврда бош муҳандис бўлиб ишлаган, 2020 йилнинг июлидан компания директори вазифасини бажарувчи сифатида фаолият юритиб келаётган Турдиев Алишер Баҳромович оиласига тааллуқли компания — «Баҳромбек келажаги» МЧЖ ҳам бир неча миллиард сўмлик давлат буюртмаларини қўлга киритиб келган.

Компания улуши тўлиғича Мавлонов Жавлонбек Абдуҳамидовичга тегишли. «Давлетовуз»нинг маълум қилишича, у Алишер Турдиевнинг куёви — синглисининг турмуш ўртоғи ҳисобланади.

«Баҳромбек келажаги» МЧЖ Инқирозга қарши курашиш жамғармаси маблағлари ҳисобидан молиялаштирилган Навоий вилояти Навбаҳор туманидаги 24-мактабни реконструкция қилиш (160-ўринли ўқув блоки қуриш) объекти бўйича тендерда (2 миллиард сўмдан ортиқ), Кармана тумани 20-сонли умумтаълим мактабини реконструкция қилиш (180 ўринли ўқув блоки қурилиши) бўйича танловда (1,8 миллиард сўмга яқин), Зарафшон шаҳридаги «Кичик саноат зонаси» ҳудудида сув ва канализация таъминоти учун ташқи муҳандислик тармоқларини қуриш бўйича танловда (108 миллион сўм) ғолиб бўлган. «Давлетовуз»нинг қайд этишича, булар фақат охирги 1-2 йилдаги давлат буюртмалари.

Шунингдек, Навоий вилоят ҳокимлиги «Ягона буюртмачи хизмати» инжиниринг компанияси ахборот хизмати 2020 йилда қурилган ижтимоий объектлар ҳақида материал ҳам эълон қилган. Унда айтилишича, компаниянинг 50 кишилик аҳил жамоаси 77,6 миллиард сўмлик 30 та ижтимоий соҳа объектлари бунёд этилишига ҳисса қўшишган.

«Давлат буюртмаларининг қариндош-уруғларга тегишли компанияларга берилиши, назаримизда, айсбергнинг бир учи холос. Чунки кўряпмизки, жамият ва давлат манфаатлар тўқнашувининг нотўғрилигини ҳатто қоралаш даражасида эмас. «Ҳамма билади-ку, бугун пайдо бўлмаган нарса» деган изоҳлардан ҳам буни сезса бўлади. Ҳали фаворитизм (синфдош, армиядош, земляк), откат (яширин пора), қурилишлар сифати, рақобат муҳитини бузиш, тадбиркорлик ривожига тўсқинлик қўйиш ҳақида ҳеч нарса дейилмаяпти», — дейди «Давлетовуз».