Энергетика вазирлиги Ўзбекистонда ҳаво ҳароратининг кескин совиши сабабли газ заправкаларининг иш вақти чекланганини маълум қилди.
Қайд этилишича, ҳозирги кунга келиб «Муборак нефть ва газ қазиб чиқариш бошқармаси»нинг нефть ва газ конларида носозлик сабаб тўхтатилган барча 14 та газ ҳайдаш агрегати ишга туширилди ва иш режимида ишламоқда. Юзага келган носозликларни бартараф этиш натижасида Муборак ГҚИЗда газ таъминоти тўлиқ тикланди. Бироқ 4 январь куни етказиб берилмаган ҳажмлар тўлдирилмади, бу эса зарур газ босимини тиклашга тўсқинлик қилади.
Шунингдек, 4—5 январь кунлари ҳаво ҳароратининг пасайиши туфайли газ истеъмолида ўсиш кузатилаётгани, шу муносабат билан, республика аҳоли истеъмолчилари ва электр энергиясини ишлаб чиқарувчи «Иссиқлик электр станциялари» АЖ корхоналарини табиий газ билан барқарор таъминлаш биринчи даражали вазифа эканлиги таъкидланган.
«Шунинг учун, бир қатор зарур вақтинчалик чоралар жорий этилмоқда. Улардан бири – автомобилларга газ тўлдириш компрессор шохобчалари (АГТКШ)нинг соат 15:00 дан 05:00 гача ишлашини чеклашдир. Ушбу вақтинчалик чора магистрал газ қувурларида барқарор газ босими таъминланиши йўлга қўйилгунга қадар жорий этилади», — дейилади хабарда.
Хабарда, мавжуд вазият билан боғлиқ равишда 4 январь куни уй хўжаликларини электр энергияси ва газ билан таъминлашда вақтинча узилишлар бўлган алоҳида ҳолатлар юз бергани, барча ҳолатлар назорат остида ва зудлик билан бартараф этиш чоралари кўрилаётгани ҳам билдириб ўтилган.
Эслатиб ўтамиз, «Ўзгидромет» ҳафта давомида аномал совуқ бўлиши кутилаётганини маълум қилган.
Изоҳ (0)