Ижтимоий тармоқларда Гулистон шаҳри марказидаги чорраҳаларнинг бирида 2 нафар йигит машиналар ҳаракатига халақит бериб рақсга тушгани акс этган видео тарқалганди. Сирдарё вилояти ИИБ ахборот хизматининг маълум қилишича, йигитларнинг шахси аниқланиб, уларга нисбатан тегишли чора кўрилган.
Маълумотларга кўра, Ховос тумани «Бунёдкор» маҳалласида яшовчи Д.Э. ва Сирдарё тумани «Заршунослик» маҳалласида яшовчи А.I. кейинчалик TikTok саҳифасига жойлаш мақсадида Гулистон марказидаги чорраҳалардан бирида машиналар ҳаракатига халақит бериб рақсга тушган ва уларнинг бу ҳаракатларини Сайхунобод тумани «Фаровон» маҳалласида яшовчи Ш.А. тасвирга олиб турган.
Содир этилган ҳуқуқбузарлик ҳаракатлари бўйича Гулистон шаҳар ИИО ФМБ ҲПБ ходимлари томонидан ушбу шахсларга нисбатан Маъмурий жавобгарлик тўғрисидаги кодекснинг 54-моддаси (эпидемияларга қарши кураш қоидаларини бузиш) 1-қисми ҳамда 183-моддаси бўйича маъмурий баённома расмийлаштирилиб, кўриб чиқиш учун Гулистон шаҳар маъмурий судига юборилган.
Суд қарорга асосан рақсга тушган йигитлар базавий ҳисоблаш миқдорининг 5 баравари (1 миллион 115 минг сўм) миқдорида жарима ҳамда 4 суткадан маъмурий қамоқ, Ш.А.га эса энг кам иш ҳақининг 5 баравари миқдорида жарима ҳамда 3 сутка маъмурий қамоқ жазоси тайинланган.
Аввалроқ Андижонда тунда хиёбон ўриндиқларини ағдариб, тўсиқлар, чиқинди урналари ва чироқларни тепиб TikTok учун видео олган безориларга чора кўрилган эди.
Изоҳ (0)