БМТнинг Тараққиёт Дастури (БМТД) «Кейинги чегара — инсон камолоти ва антропоцен» деб номланган 2020 йилги Инсон камолоти ҳисоботининг навбатдаги нашрини тақдим этди. Унда Ўзбекистон дунёнинг 189 мамлакати ичида 0,720 индекс (максимал индекс қиймати 1,000) билан 106-ўринни эгаллаб, 2019 йилдаги натижаларига нисбатан икки ўринга кўтарилди.
Иқтисодий тараққиёт ва камбағалликни қисқартириш вазирлиги ахборот хизмати хабарига кўра, Инсон камолоти тўғрисидаги ушбу ҳисобот БМТ Тараққиёт Дастури томонидан 1990 йилдан бошлаб нашр этиб келинаётган бўлиб, Ўзбекистоннинг кўрсаткичлари 1993 йилдан буён қайд этиб келинмоқда. Ҳисоботнинг Инсон камолоти индекси инсон тараққиёти йўлида 3 та асосий омиллар — узоқ ва соғлом ҳаёт кечириш, билим олиш ва муносиб турмуш даражаси бўйича эълон қилинадиган статистик маълумотлар тўплами ҳисобланади.
Индекс ҳисоботи бўйича Ўзбекистоннинг натижалари қуйидагича:
- аҳолининг туғилганда кутилаётган умр кўриш давомийлигини белгилайдиган умр кўриш давомийлиги индекси 71,7 йилни ташкил этади (+0,1 йил ўсиш);
- таълим индексининг таълимнинг ўртача давомийлиги 11,8 йил (+0,3 йил ижобий ўзгариш) ва кутилаётган таълим давомийлиги 12,1 йилни (+0,09 йил ижобий ўзгариш) ташкил этган;
- харид қобилияти паритети бўйича аҳоли жон бошига ЯМД миқдори 7142 долларни ташкил этиб ўтган йилга нисбатан 680 долларга ўсган.
- Маълумот учун, Инсон камолоти индексининг 2020 йилги ҳисоботида 2019 йил якунлари таҳлил қилинади.
Шавкат Мирзиёевнинг 2020 йилнинг 2 июндаги «Ўзбекистон Республикасининг халқаро рейтинг ва индекслардаги ўрнини яхшилаш ҳамда давлат органлари ва ташкилотларида улар билан тизимли ишлашнинг янги механизмини жорий қилиш тўғрисида»ги фармонига мувофиқ Ўзбекистон учун устувор халқаро рейтинг ва индекслар бўйича асосий самарадорлик кўрсаткичлари (KPI) белгилаб олинган. Фармонга асосан, 2030 йилга бориб мамлакат ушбу индексда 0,82 га етиши кутилмоқда.
Изоҳ (0)