Хитой шарқий томондан Россия билан чегарадош бўлган Дуннин шаҳрида транспорт қатновини ёпиб қўйди. Бу ҳақда ҳукумат қарорига таяниб Yicai хабар берди, деб ёзмоқда «РБК».
Қайд этилишича, шаҳар 13 декабрга ўтар кечасидан бошлаб ёпилган. Унда, шунингдек, жамоат транспоти ҳаракати ва автомобилда юриш ҳам вақтинчалик тўхтатилган.
Хитой ҳукумати Дуннин шаҳри (Хейлунсзян провинцияси) билан транспорт алоқасини тўлиқ тўхтатишга қарор қилди — шаҳарда коронавируснинг янги ўчоғи пайдо бўлган.
Шаҳардаги барча дўконлар, бозорлар, почта ва коммунал хизматлар 5 кун давомида ҳукуматга барча ходимларининг коронавирус тести натижалари ва уларнинг ҳудудида инфекция йўқлигини тасдиқловчи текширув тўғрисидаги ҳисоботни тақдим этиши шарт.
Sinhua хабарига кўра, ҳукумат Дуннин шаҳрини 10 декабрь куни коронавирусга чалиниш бўйича янги ҳолат аниқланганидан сўнг ёпиб қўйган. Ушбу шаҳар жойлашган Хейлунсзян провинциясида жами 5 киши инфекцияга чалингани аниқланган бўлиб, уларнинг 3 нафари COVID-19’нинг белгисиз ташувчилари.
«ТАСС»нинг ёзишича, доимий аҳолиси сони 210 мингдан ортиқ Дуннин шаҳри билан Владивосток ораси — 60 километр. Ушбу шаҳарда маҳаллий манбалардан касаллик юқиши бир неча ойдан бери кузатилмаётганди. Янги ҳолат аниқланганидан сўнг Дуннинда ҳарбий ҳолат эълон қилинди.
Хитойда коронавирусга чалиниш бўйича биринчи ҳолат Ухань шаҳрида 2019 йилнинг охирларида аниқланганди. Шундан буён мамлакатда 86,7 минг киши касалликка чалингани қайд этилган. Мамлакатда пандемияга қарши чора сифатида транспорт ҳаракати чекланган, алоҳида ҳудудлар қатъий карантинга ёпилган.
Коронавирус ўчоғи айнан Хитойда пайдо бўлганига қарамай, мамлакат касалланганлар сони энг кўп бўлган давлатлар 10 талигига ҳам кирмайди. Жонс Ҳопкинс университети маълумотига кўра, Хитой инфекцияга чалинганлар сони бўйича 73-ўринда. Мамлакатда пандемия бошидан буён COVID-19 беморларининг 4,7 минг нафари вафот этган. Таққослаш учун, АҚШда 296,1 минг киши коронавирус қурбони бўлган.
Изоҳ (0)