Ортиқча вазн ҳамиша долзарб муаммо бўлган. Ҳатто сарвқомат нозик жинс вакиллари ҳам айрим вақтда қорин ва бел қисмида йиғилган ёғлардан шикоят қилиши мумкин. Қадни тик тутиб юриш осилган қоринни билинмаслигига ёрдам беради. Қолаверса, тўғри танлов қилиб, қоидаларга амал қилинса, кийим билан ҳам қоматдаги камчилик ва қориннинг осилган қисмини яшириш мумкин. Бу борада ёрдам берадиган маслаҳатлар билан бўлишамиз.
Трапеция бичимли кўйлак танланг
Қоматга ёпишиб турмайдиган ва олди очиқ бўлмаган моделга эътибор қаратинг. Озғин, аммо қорни билиниб турадиганларга олд қисми очиқ бўлган кўйлак танлаш тавсия қилинмайди. Чунки бу камчиликка янада урғу беради. Этаклари бироз кенг бўлган трапеция бичимли либос бу борада сизга ёрдам бера олиши мумкин.
Ноодатий кийинишни ёқтирадиганлар мазкур бичимли либоснинг 20—30 йилларга хос бўлган попукли ва бурмали кўринишдагисини танласа ҳам бўлади.
Тананинг қорин соҳасига эътибор қаратадиган либос танламанг
Қоринни шим ёки юбка камари билан кичикроқ кўрсатаман, деб ўйласангиз янглишасиз. Чунки камарнинг усти, тагидан қориннинг бошқа қисмлари билиниб қолиб қайтанга хунук кўрсатиб қўйиши мумкин. Юбка ёки шим қоринни буткул ёпиб туриши, унинг ярмидан бўлиб кўрсатиб қўймаслиги керак. Яхшиси камар ёки белбоғни белнинг энг ингичка жойига тақинг.
Агар юбкани жилет ёки кардигансиз кийилса, кенгроқ турадиганини танлаш керак. Аммо бу тўғри бичимли юбка киймасликни билдирмайди. Шунчаки иложи борича уларни жилет, жакет ва кардиган билан мослаб кийган яхши. Шунда қоринга ортиқча урғу берилмайди ва камчилик кўзга ташланмайди.
Устки кийимни тўғри қадаш керак
Устки кийимингиз тугмасини қориннинг чиққан қисми ёпилганидан кейинги жойидан қаданг. Тепасидан қадаб қўйсангиз, қорин чиққандек кўриниб, эътибор тортади.
Шим ва жинси танлаётганда ҳам эҳтиёткор бўлиш, олд қисми қоринни янада катта кўрсатиб қўймаслиги учун кийиб кўриб кейин харид қилиш. Устки кийим танлаганда эса кенгроқ турадигани ва ёпишмайдиганига эътибор қаратиш тавсия қилинади.