Норвегия парламенти аъзоси Кристиан Тибринг-Гедденинг фикрича, АҚШ президенти Дональд Трамп давом этаётган низоларни ечишдаги ҳиссаси учун тинчлик йўналишида Нобел мукофотини олишга муносиб. Бу ҳақда «Интерфакс» хабар берди.
«Ўйлашимча, халқлар ўртасида тинчлик ўрнатишга уриниб, у тинчлик йўналишидаги бошқа номзодларга нисбатан кўпроқ иш қилди», — дея маълум қилган Норвегия парламенти аъзоси ва Норвегиянинг НАТОдаги делегацияси раиси Кристиан Тибринг-Гедде.
Тибринг-Гедде Нобел қўмитасига хат йўллаган ва унда Трамп маъмурияти Исроил ва БАА ўртасида тинчлик ўрнатилишида асосий рол ўйнаганини маълум қилган.
Шунингдек, норвегиялик депутатнинг мактубида айтилишича, АҚШ президенти низолашаётган томонлар ўртасидаги алоқаларнинг кучайишида ва бошқа давом этаётган низолар бўйича ижобий ўзгаришлар юз беришида асосий рол ўйнаган, Шимолий Кореянинг ядро потенциали муаммосини ҳал қилишда ҳам Трампнинг ўрни муҳим бўлган.
Бундан ташқари, депутат Яқин Шарқдан АҚШ қўшинларининг олиб чиқилгани учун Трампни мақтаган. Тибринг-Гедде Трампнинг кўнглини топишга уринмаётганини таъкидлаб, унинг тарафдори эмаслигини айтган.
«Сўнгги йилларда тинчлик мукофотини олганлар Дональд Трампга қараганда анча кам иш қилган. Масалан, Барак Обама (АҚШнинг собиқ президенти) ҳеч нарса қилмаган», — деди депутат.
Тибринг-Гедде 2018 йилда яна бир норвегиялик сиёсатчи билан Трампнинг номзодини тинчлик йўналишида Нобел мукофоти учун илгари сурган, бироқ ўшанда Трамп бу мукофотни олмаган.
2020 йилнинг август ойида АҚШ президентининг миллий хавфсизлик бўйича маслаҳатчиси Роберт ЎБрайан Исроил ва БАА ўртасидаги дипломатик келишув учун Дональд Трампнинг номзодини Нобел мукофотига қўйишга чақирган.
2019 йилнинг сентябрь ойида БМТнинг Бош Ассамблеясида Дональд Трамп агар Нобел мукофоти адолатли берилганида, у мукофотни олишини айтган.
Барак Обама 2009 йилда «халқаро дипломатия ва халқлар ўртасидаги ҳамкорликни мустаҳкамлашдаги фавқулодда ҳаракатлари» учун тинчлик йўналишида Нобел мукофотини олган.
Эслатиб ўтамиз, Исроил ва БАА расмийлари тинчлик келишувига эришгани ҳақида маълум қилганди. Расмий келишув 2020 йилда АҚШда имзоланади. Шунингдек, БАА Исроилга нисбатан 48 йил давом этган иқтисодий бойкотни бекор қилди. БАА Исроил билан тинчлик келишувига эришган кам сонли араб мамлакатларидан бири ҳисобланади