Британия—Швециянинг AstraZeneca фармацевтика компанияси коронавирусга қарши вакцинасининг АҚШда ўтказилаётган учинчи фаза синовларини тўхтатиб қўйди. Бунга беморлардан бирида иккиламчи таъсир пайдо бўлгани сабаб бўлган. Бу ҳақда Америкадаги Stat тиббиёт журнали компания вакилига таяниб хабар берди, дея маълум қилади «ТАСС».
Компания вакилининг сўзларига кўра, стандарт текширув «вакцинациянинг тест жараёнларини тўхтатиб туришга олиб келган бўлиб, хавфсизликка оид маълумотлар таҳлилдан ўтказилади». Нашрнинг аниқлик киритишича, вакцина сабаб иккиламчи таъсир пайдо бўлган синов иштирокчиси тузалиб кетади.
Маълумотларга кўра, исми ошкор этилмаган бемор Буюк Британияда коронавирусга қарши вакцинанинг иккинчи ёки учинчи фазасида иштирок этган, бироқ AstraZeneca вакили ушбу ҳолатга изоҳ беришни истамаган. Шунингдек, у вакцинани қабул қилиш оқибатида беморда қандай иккиламчи таъсирлар пайдо бўлмагани ҳам ойдинлик киритмаган.
Эслатиб ўтамиз, Оксфорд университети олимлари билан ҳамкорликда яратилган AstraZeneca вакцинасининг учинчи фазаси АҚШда август охирларида бошланган бўлиб, унда 30 минг америкалик иштирок этмоқда. Уларнинг вакцинаси ҳали тасдиқланмаган. Вакцина айни пайтда Буюк Британия, Бразилия ва Жанубий Африкада клиник синовлардан ўтказилмоқда. Компания вакцинани яратиш учун АҚШ ҳукуматидан бир миллиард доллардан ортиқ маблағ олган.
Аввалроқ Буюк Британия Pfizer Inc, BioNTech ҳамда Франциянинг Valneva компаниялари билан ҳозирда синов жараёнида бўлган коронавирусга қарши вакциналарни 90 миллион дозада сотиб олиш бўйча шартнома имзолагани хабар берилган эди.