Уйида таниш шифокорнинг тавсиясига кўра даволанишга ҳаракат қилган, лекин оқибатда аҳволи янада ёмонлашиб вафот этган беморнинг касаллик тарихи ҳақида «Ўзбекистон 24» телеканалидаги кўрсатувда маълум қилинди.
Қайд этилишича, бемор 63 ёшда бўлган, охирги 10 йил давомида қандли диабетнинг 2-тури билан касалланган. Бундан ташқари унда ёндош касалликлардан гипертоник касаллик 2-босқич ва 4-хавф даражасида бўлган. Шунингдек, бемор семизликнинг 1-даражасидан азият чеккан.
«Бемор 22 июль куни тана ҳарорати ошиши, бироз йўтал, дармонсизлик, ҳолсизлик билан безовталанган ва ўзининг оилавий бир таниш шифокорига мурожаат қилган. Ҳудудий поликлиникага эса мурожаат қилмаган. Таниш шифокор келиб уни назоратдан ўтказган, эпидемиологик анализни суриштириб, беморга касаллик қаердан юққанлигини ўзича гумон қилган.
Аслида беморнинг ўғли ҳамкасбларидан COVID-19’ни юқтириб олган ва катта ёшли беморнинг ўғлида касаллик енгил кечган. Лекин ўз-ўзини яккалашни амалга оширмагани сабабли отасига бу инфекция юққан.
Шифокор ташхис қўйиш учун беморни МСКТ (Компьютерлаштирилган мультиспирал томография) таҳлилига юборган. Унда беморнинг ўпкасида икки томонлама пневмония ташхиси билан натижалар олинган. Унга кўра, ўпка тўқимасининг 50-60 фоизи зарарлангани аниқланган. Шундан сўнг уларга таниш бўлган шифокор жуда кўп миқдорда даволаш учун дори муолажаларини буюрган.
Булар 12 хил турдаги дори муолажалари бўлиб, унда бирдан 3 хил антибиотик ва қон суюлтирадиган воситаларнинг 3 хил тури қайд этилган. Гармон дорилар эса осма уколлар билан бирга қуйилган», – дейилади кўрсатув давомида.
Таъкидланишича, бемор бу даво муолажаларини 3 августга қадар ўтказиб, аҳволи яхшиланмаган. Буни устига беморда ўткир ҳаво етишмовчилиги пайдо бўлган. Юрак уруши сони минутига 130 дан ошиб кетган. Бўғилиш, нафас сиқиш, ҳансираш аломатлари пайдо бўлган. Шундан сўнг бемор яна бир бора МСКТ таҳлилига мурожаат қилган. Таҳлил натижасига кўра, аҳвол яхшиланиш ўрнига ёмонлашиб, ўпканинг 70-80 фоиз тўқимаси зарарлангани аниқлаган.
Шундан сўнг бемор ўта оғир ҳолатда тез ёрдам бригадаси ёрдамида COVID-19’га ихтисослашган марказга олиб борилган ва реанимация бўлимига ётқизилган. Бемор зудлик билан сунъий нафас олдириш мосламасига уланган. Лекин шифокорларнинг уринишига қарамасдан бемор вафот этган.
Соғлиқни сақлаш вазирлиги бу ёшдаги эркак ўлими ҳақида ҳали эълон қилмаган, лекин бугун 64 ёшли сергелилик эркак ўлими ҳақида хабар берганди. Бироқ унинг қачон касал бўлгани ҳамда бошқа маълумотлар ҳақида хабар қилинмаган.
Мавзуга доир:
- «Коронавирусни даволашда ‘капелница’ қўйманг!». Блогер нотўғри даволаниши оқибатида оғир пневмонияни бошдан кечиргани ҳақида
- COVID-19’ни даволашда қандай дори-дармонлар қўлланилилиши мумкинлиги ҳақида маълумот берилди
- «Тошкент шифокорлари»: Ўзингизни кўр-кўрона даволашга киришиб, аҳволингизни оғирлаштириб қўйманг!