Италияда коронавирусга чалиниш бўйича кунлик касалланишлар сони 38 фоизга ошди, деб хабар бермоқда AP.
Қайд этилишича, сўнгги суткада 552 кишида COVID-19 аниқланган. Мамлакатда май ойи охиридан буён кунлик касалланишлар сони бундай юқори бўлмаган эди.
Янги касалланиш ҳолатларининг қарийб учдан бир қисми Италияда коронавируснинг маҳаллий ўчоқларидан бири бўлган Венето вилоятига тўғри келмоқда. Бир кун давомида у ерда коронавирусни аниқлаш бўйича қарийб 16,5 мингта тест ўтказилган.
Венето вилояти раҳбари Лука Дзайннинг сўзларига кўра, касаллик Испания, Перу, Хорватия ва Грециядан яқинда қайтган аҳолидан аниқланган.
«Таътил бу катта таваккалчилик. Ҳар бир киши қаерда дам олмоқчилигини ўзи ҳал қилиши керак. Аммо бир неча ҳафтадан буён таътил вақтида ушбу касалликка чалинган беморлар сонининг кўпаяётганини қайд этаётганимиз ҳам рост», — деган у.
Эслатиб ўтамиз, Италия Европа давлатларидан биринчилардан бўлиб коронавируснинг тез тарқалишига дуч келди. Март ойидаёқ мамлакат COVID-19 қурбонлари сони бўйича Хитойни ортда қолдирганди. Шундан сўнг Италия узоқ вақт давомида касалланганлар сони бўйича Европада етакчилик қилиб келди.
21 июль куни мамлакат соғлиқни сақлаш вазири Роберто Сепаранса Италия коронавирус эпидемиясини енгганини маълум қилди. Унинг таъкидлашича, мамлакат «бўрондан» чиқди, лекин ҳали хавфсиз жой топмади. Сўнгги ойлар Италия тарихида Иккинчи Жаҳон уруши давридан буён энг қийин вақт бўлган. Шу билан бирга, мавжуд вазир вазият касаллик ортда қолди, деб айтишга ҳозирча имкон бермайди. Вакцина пайдо бўлганидан кейингина тўлиқ ғалаба ҳақида гапириш мумкин.