Англиянинг Кент графлигида яшовчи аёл 76 килога озишнинг табиий усулини топди. Унинг муваффақияти Daily Mail нашри эътиборига тушди.
Стеф Гиллнинг айтишича, 18 йил олдин тўйида турмуш ўртоги Жоннинг уни кўтариб уйга олиб киришини орзу қилган.Бироқ эр-хотин ушбу анъанани амалга ошира олмаган, чунки ўшанда келиннинг вазни 114 килограмм эди.
«Эрим мени кўтара олмаслигини билардим. Ҳамма шундай қилади, биз эса қилолмаймиз, деб хафа бўлгандим», — дейди аёл.
Орадан бир неча йил ўтса ҳам Гиллни ушбу орзу тинч қўймаган. У 2015 йилда озишга қаттиқ киришди. Вазни 140 килограмм бўлгани учун у ошқозонни кичрайтириш бўйича операцияни бошдан кечирди. Жарроҳлар унинг ошқозонининг 80 фозини қисқартирди.
«Кўпчилик бу усулни тез вазн ташлашга ёрдам беради, деб ўйлайди. Бироқ озиш учун ҳаёт тарзини ўзгартириш керак», — дейди аёл.
Гилл маҳаллий югуриш клубига аъзо бўлди ва мунтазам равишда югуриш мусобақаларида қатнаша бошлади. Аёл ярим марафонларда қатнаша бошлаганидан кейин 64 килограммгача вазн ташлади.
Ўтган ҳафта, тўйлари бўлган санада Жон рафиқасининг орзусини амалга оширди. У аёлини қўлида кўтариб, уйга олиб кирди.
Уларнинг 16 ёшли қизи томонидан олинган суратларда Гилл келин либосини кийган ҳолда жилмайиб турганини кўриш мумкин.