Олий Мажлис Қонунчилик палатаси депутати Нодирбек Тилаволдиев 15 кун карантинда бўлиб чиқди. Бу ҳақда «Миллий тикланиш» демократик партияси сайтида маълум қилинди.
«Пойтахтдан вилоятга келишимиз чоғида самолётда биз билан учиб келган йўловчилардан бирида коронавирус борлиги гумон қилиниб, карантинга олинди. Табиийки, ўша йўловчи билан бирга бизни — бошқа йўловчиларни ҳам карантинга олишди. Мана, ўн беш кун карантинда бўлдик биз ҳам. Шукурки, ҳеч қандай вирус аниқланмади, хавф-хатар ўткинчи бўлиб чиқди», — деб ёзади депутат.
Унинг қайд этишича, фуқаролар карантин сўзи моҳиятини тўлиқ тушуниб етмаяпти. Карантинда сақланаётган фуқаролар ва уларнинг оила аъзоларига «вируслар» деб ном қўйиб, маҳалла-кўйда уларнинг обрўсига путур етказиб, ножўя гаплар тарқатиш ҳолатлари ҳам учраб турмоқда.
«Ваҳоланки, бугунги кунда касаллик тарқалишининг олдини олиш учун 100 мингдан ортиқ фуқаро карантинга олинган. Фуқароларимиз карантинга олиниш бу инсон касалланган деган маънони англатмаслигини, фақатгина эҳтиёт чораларини кўриш мақсадида муайян муддатга изоляция қилиш ҳолати эканини яхши тушуниб етиши керак», — деган депутат.
Мавзуга доир: Ўзбекистонда коронавирусга чалинганлар сони карантинга олинганлар ҳисобига ортаётгани маълум қилинди
Мавзуга доир: Бош давлат санитария инспектори: «Хориждан келганига бир ой бўлган фуқаро карантинга мажбурий тартибда жойлаштирилмайди»
Қатъий интизом, масъулият, сабр-тоқат, жипслик ва фидойилик билан хитойликлар ушбу балони енгиш мумкинлигини амалда исботлаб берди. Сингапур, Жанубий Корея ва Япония халқининг ҳам метин иродаси, гигиенага асосланган кундалик турмуш тарзи, ҳукумат томонидан қабул қилинган қонун ва талабларга ҳурмат, итоаткорлик мазкур давлатларда пандемияни жиловлаш имконини берди», — деб таъкидлаган Олий Мажлис Қонунчилик палатаси депутати.
Сўнгги маълумотларга кўра, Ўзбекистонда коронавирусга чалинганлар сони 263 нафарга етди. Мамлакатда илк касалланиш ҳолати қайд этилганидан бери 25 нафар бемор соғайди, икки нафари эса касалликдан вафот этди.