Тунги навбатчилик чоғида Навоий шаҳри кўчаларини айланиб юрган профилактика инспекторлари ёрдам сўраб бақираётган ёш боланинг овозини эшитиб қолган.
Навоий вилоят ИИБ ахборот хизматининг маълум қилишича профилактика инспектори лейтенант Аббос Рўзиқулов ва профилактика катта инспектори катта лейтенант Адҳам Пирназаров дарҳол овоз келаётган томонга қараб югуради.
«Инспекторлар Жасорат кўчасида жойлашган 23-уйга етиб борганда 4-5 ёшли бола уйнинг 4-қавати балконидан осилиб турган бўлган. Шундан сўнг улар уйнинг 4-қаватига кўтарилади ва 2014 йилда туғилган Р.К.ни қутқариб қолади.
Арзимагандек кўринган мазкур ҳолат аслида мудҳиш якун топиши ҳам мумкин эди, аммо ташкил этилган тунги навбатчилик ҳамда профилактика инспекторининг жонбозлиги туфайли жажжи бир инсоннинг ҳаёти сақлаб қолинди», — дейилади хабарда.