Евросиё иқтисодий иттифоқи ортида яширин сиёсий мақсадларни кўзда тутган ташкилот эканлигини бугун ҳеч кимдан яшириб бўлмайди, дейди Ўзбекистон «Миллий тикланиш» демократик партияси раҳбари Алишер Қодиров «Kun.uz» нашрига берган интервьюсида.
Аввалроқ Россия Сенати раиси Валентина Матвиенко Ўзбекистонда Евросиё иттифоқига қўшилиш масаласида раҳбарият даражасида қарор қабул қилингани, ҳозирда иттифоққа қўшилиш масаласи кўриб чиқилаётганини маълум қилган эди. Кейинроқ россиялик сенатор Фарид Муҳаметшин Ўзбекистоннинг ЕОИИда кузатувчи мақомини олиши масаласи 2020 йилда ҳал этилиши мумкинлигини таъкидлаган эди.
Мавзуга доир: Ўзбекистон 2022—2025 йилларда ЕОИИга аъзо бўлиб кирмоқчи, Содиқ Сафоев: Ўзбекистон Евросиё иқтисодий иттифоқига қўшилиш имкониятларини уч йилдан бери ўрганяпти
«Келинг, очиқча гаплашайлик, Евросиё иқтисодий иттифоқи — номи билан иқтисодий бўлган, аммо ортида яширин сиёсий мақсадларни ҳам кўзда тутган ташкилот. Буни бугун ҳеч кимдан яшириб бўлмайди. Бундай ҳолатларни тарихда ўзбек халқи кўп бора бошидан ўтказган ва етарлича хулосалар қилиб олган, деб ўйлайман», — дея қўшимча қилган партия етакчиси.
Унинг фикрича, номига иқтисодий ва туб моҳиятида сиёсий мақсадлар кўзланган иттифоқлар ҳозирги замонда ўзини оқламади.
Биз, «Миллий тикланиш» демократик партияси аъзолари ҳар қандай иқтисодий манфаатлардан кўра мамлакат озодлиги, унинг манфаатлари устуворлиги, озод жамияти билан эркин ривожланишини кўпроқ устувор деб ҳисоблаймиз...Биласизми, Евросиё иқтисодий иттифоқи — қисқа давр учун иқтисодий манфаатларга таянган, узоқ давр учун эса сиёсий манфаатларга таянган иттифоқ.
Яқин ойларда маълум бўлган ва жараёнлари анча вақтдан буён давом этаётган бу уринишлар Ўзбекистонни Марказий Осиёнинг юраги, кўпгина давлатлар билан чегарадош ва геополитик мураккаб ўрнини ҳисобга олган ҳолатда бўлмоқда.
Ўзбекистоннинг иттифоққа киришига ундалиши, уни аъзоликка тортишга нисбатан бўлаётган ҳаракатларда биринчи навбатда ўша аъзоларнинг манфаатлари турибди. Буни кескинроқ тарзда иккинчи СССР деса ҳам бўлади.
Шу нарса аниқки, Ўзбекистон кимларнингдир манфаати учун хизмат қиладиган давлат эмас. Бу давлат ўз халқи ва давлат манфаатларини биринчи ўринга қўяди. Биз партиямиз депутатлари билан бу масалани кўп гаплашдик ва, такрорлаб айтаманки, масала жуда чуқур ўйланиши керак.
Албатта, биз учун давлатимизнинг иқтисодий юксалиши, унинг бошқа давлатлар билан тенг ривожланиши биринчи ўринда, лекин шу билан бирга, мамлакатимиз манфаатларига зид бўлган, сиёсий эркинлиги ва суверенитетига таъсир қиладиган, давлат усти идораларига қайсидир маънода тобе бўлиш эҳтимоли мавжуд бўладиган ҳар қандай иттифоққа киришни ёқламаймиз.
Яъни, биз иқтисодий кўринишдаги сиёсий мақсадларни кўзлаган иттифоққа киришга мутлақо қаршимиз.
Алишер Қодиров, Ўзбекистон «Миллий тикланиш» демократик партияси раҳбари