Мексикалик наркобарон Хоакин Гусмандан интервью олган Голливуд юлдузи Шон Пеннга нисбатан суриштирув бошланди

Мексика расмийлари машҳур Голливуд актёри ва режиссёр Шон Пенн ҳамда мексикалик актриса Кейт Дель Кастильога нисбатан суриштирувни бошлади. Бу ҳақда «ТАСС» хабар бермоқда.

Суриштирувга шу ҳафтада қўлга олинган Мексикадаги «Синалоа» наркокартели раҳбари, «Пакана» лақабли Хоакин Гусман билан уюштирилган интервью сабаб бўлган. Мазкур суҳбат асосидаги материал 9 январь, шанба куни Rolling Stone журналининг электрон кўринишида чоп этилди.

Шу билан бирга, Associated Press маълумотларига кўра, наркобарон ўтган йил октябрида актёрга берган интервью жиноятчи Дуранго штатининг чекка қишлоқ жойида яширинган жойни аниқлаш ва уни қўлга олишга ёрдам берган. Пенн бунда қандайдир даражада кўмак берган ёки йўқлигига аниқлик киритилмаган.

Актёрнинг айтишича, «Синалоа» етакчиси билан суҳбат Мексикадаги чангалзорлардан бирида бўлиб ўтган ва етти соат давом этган. Суҳбатда Кейт Дель Кастильо ҳам иштирок этган, у Шоннинг жиноятчи билан интервьюсини ташкиллаштирган. Гусман ўзининг ҳаёти  ҳақида фильм олмоқчи бўлган ва бу лойиҳани Кастильога топширган. Актрисанинг Гусман билан яқин алоқалари ҳақида хабардор бўлган Пенн эса у билан боғланиб, «Пакана» билан учрашув уюштиришни сўраган.