Чеченистон раҳбари Рамзан Қодиров ижтимоий тармоқлардан биридаги саҳифасида Россияда ишлаб чиқарилган YotaPhone 2 смартфонидан фойдалана бошлаганини маълум қилди.
Қодиров қурилманинг баъзи техник хусусиятларини мақтаб, россияликларни iPhone ўрнига, YotaPhone ишлатишга даъват этди. «Америка Россияни душман деб билади, бизнинг фуқароларимиз эса ўн миллионталаб iPhone сотиб олмоқда ва бу билан АҚШ Ҳарбий саноат комплексини молиялаштирмоқда. Биз импорт ўрнини босиш муаммосини ҳал қила оламиз, деб ишонаман. Шунда улар ҳеч қанақа санкциялар билан бизни ўз ноғорасига ўйната олмайди», — деб ёзади Чеченистон раҳбари.
Шунингдек, Рамзан Қодиров ўз ҳамюртларига АҚШ ижтимоий тармоқларидан воз кечиб, «ВКонтакте» каби рус тармоқлардан фойдаланишни тавсия этди.
Россиянинг Yota Devices компанияси янги моделдаги YotaPhone 2 смартфонини 3 декабрь куни Лондонда тақдим этмоқчи.
Смартфон иккита экранга эга эканлиги билан бошқалардан ажралиб туради. Асосий дисплейи 1920×1080 пикселли 5 дюймли рангли экран бўлса, иккинчиси «электрон сиёҳ» технологияси асосидаги 960×540 пикселли 4,7 дюймли оқ-қора орқа экрандир.
Оқ-қора экранда телефонни блокдан чиқармасдан туриб, асосий экрандаги маълумотларни кўриш мумкин, бу қурилмага бир марта олган қувватни 50 соатгача етказиш имконини беради.
Изоҳ (0)