Buyuk Britaniya ishga qabul qilish va bandlik konfederatsiyasi ma’lumotlariga ko‘ra, o‘tgan haftada bo‘sh ish o‘rinlari yangi yuqori darajaga ko‘tarildi. Bu haqda Bloomberg xabar bermoqda.
Ish beruvchilar 12-iyungacha bo‘lgan haftada 1,69 mln ish o‘rinlarini e’lon qildi. Bu 2022-yil uchun rekorddir. Deyarli barcha kasblar bo‘yich o‘sish kuzatilmoqda.
Eng ko‘p bo‘sh ish o‘rinlari qurilish sektorida bo‘lmoqda. Buyuk Britaniya bu sohadagi talabni qondirish uchun yiliga 50 ming kishini yollashi kerak bo‘ladi. Duradgorlar va qurilish nazoratchilariga talab ortgan.
Bu O‘zbekiston uchun imkoniyatmi?
Markaziy Osiyodagi ko‘plab kambag‘al oilalar uchun Rossiya—Ukraina urushining uzoq davom etishi moliyaviy halokatga olib kelishi mumkin.
Jahon banki hisobotiga ko‘ra, Rossiyada Markaziy Osiyodan kelgan 8 millionga yaqin muhojir bo‘lib, mamlakat asosiy manzil sifatida o‘z jilosini yo‘qota boshlagach, ular boshqa muqobil variant qidirmoqda.
Iyun oyida Buyuk Britaniyadagi fermer xo‘jaliklari mahsulot tanlab olish va Brexit bilan bog‘liq ishchi kuchi tanqisligini to‘ldirish uchun Markaziy Osiyodan ishchilarni qabul qilishni boshladi.
O‘zbekiston uchun Buyuk Britaniyaning ishga qabul qilish dasturi manfaatli, chunki hukumat avvalroq Rossiyaga qaramlikni kamaytirish uchun mehnat migratsiyasi yo‘nalishlarini diversifikatsiya qilishni maqsad qilgan, — deydi Eurasianet nashri.
Jahon banki ma’lumotlariga ko‘ra, o‘tgan yili O‘zbekiston pul o‘tkazmalarining 56 foizini Rossiyadan olgan. Bu ko‘rsatkich 21 foizga qisqarishi kutilmoqda.
Avvalroq Ukrainadagi urush sabab O‘zbekiston va boshqa davlatlarning fuqarolari Rossiyaga ishlash uchun borishi qanday kechayotgani haqida xabar berilgandi.
Izoh (0)